L'Atelier de Joël Robuchon

营业中

休息中

4.5

4.5

341 食记

味道

环境

服务

卫生

抵食

|

33462

中环

$801以上

法国菜 Fine Dining

268

36

8

FeivouriteFood

等级4

197

7

大家可能认识Gordon Ramsay，不过大家又知唔知佢嘅师傅Joël Robuchon？佢系全世界攞得最多米芝莲星星嘅主厨，被称为法国料理之神，而今日介绍嘅就系佢旗下、喺每个国家都差唔多攞到米芝莲星嘅连锁法国菜餐厅。L’Atelier de Joel Robuchon喺一间喺香港连续攞咗11年米芝莲三星嘅法国菜餐厅，由2012年去到今年，亦都曾经系亚洲50最佳餐厅，可以话系香港最具代表性嘅高级 fine dining 法国菜。被称为法国料理之神既主厨Joël Robuchon，曾坐拥35颗米芝莲星星，佢曾经教过Gordon Ramsay。主厨其实喺13岁𠮶时系立志成为一位神父，所以之前喺修道院帮啲修女煮𩠌，佢觉得依个系神嘅召唤，所以系15岁𠮶时就立志想成为一个厨师，喺佢38岁就打破咗最年轻攞米芝莲三星嘅纪录。虽然主厨过咗身几年，但佢呢个传说都系一直延续，餐厅采用食材搭配优秀，服务顶级，提供一个一流嘅FineDining体验。餐厅可以透过电话预约，依家亦都可以喺网上预约，基本上如果系星期六日，要两三个月前预约，平日可能可以执到一个月嘅booking，订位个时就要比订金，每人500。餐

更多

大家可能认识Gordon Ramsay，不过大家又知唔知佢嘅师傅Joël Robuchon？佢系全世界攞得最多米芝莲星星嘅主厨，被称为法国料理之神，而今日介绍嘅就系佢旗下、喺每个国家都差唔多攞到米芝莲星嘅连锁法国菜餐厅。

L’Atelier de Joel Robuchon喺一间喺香港连续攞咗11年米芝莲三星嘅法国菜餐厅，由2012年去到今年，亦都曾经系亚洲50最佳餐厅，可以话系香港最具代表性嘅高级 fine dining 法国菜。

被称为法国料理之神既主厨Joël Robuchon，曾坐拥35颗米芝莲星星，佢曾经教过Gordon Ramsay。主厨其实喺13岁𠮶时系立志成为一位神父，所以之前喺修道院帮啲修女煮𩠌，佢觉得依个系神嘅召唤，所以系15岁𠮶时就立志想成为一个厨师，喺佢38岁就打破咗最年轻攞米芝莲三星嘅纪录。虽然主厨过咗身几年，但佢呢个传说都系一直延续，餐厅采用食材搭配优秀，服务顶级，提供一个一流嘅FineDining体验。

餐厅可以透过电话预约，依家亦都可以喺网上预约，基本上如果系星期六日，要两三个月前预约，平日可能可以执到一个月嘅booking，订位个时就要比订金，每人500。

餐厅喺置地广场，可以喺置地广场3楼上4楼，喺地下其实都有专属嘅升降机去到。

餐厅有分L'ATELIER同LE JARDIN，前者喺法文系解工作室，后者系解花园，前者其实系坐喺一个Bar Counter，有大概30至40个位围住个开放式厨房，后者就好似正规 Dining Table，大概有8至10张枱，真系可以望住平台花园嘅座位。我自己钟意前者，因为佢可以望到厨师嘅制作过程，气氛比较亲切但又不失高雅，而且可以叫到一份特别嘅Menu

后者就比较有空间感，枱与枱之间距离充足，隐私度十足。

餐厅同平时嘅米芝莲餐厅好唔同，一入到去就可以见到招牌嘅红色同黑色做主调，时尚简约但有格调，配上幽暗嘅灯光，突显光猛嘅开放式厨房，虽然冇好似香港其他楼底好高、空间感好大嘅华丽法式格局，冇好浮夸嘅水晶灯、银器，但佢就系带有时尚感，平实又摩登，就连防疫嘅隔板都系用红黑色。

呢度嘅厨师都系着返黑色，衬返呢一个环境，呢一点非常之细心。

如果你系庆祝生日或者特别节日，可以要求预约一个蛋糕。
-
1️⃣ Lunch Menu 💰690/790/990

呢度嘅餐牌有两款，如果你系坐吧枱就会有第一页，佢系一个Special Tasting Menu，将佢10几道嘅招牌菜用small portion呈献，价钱方面都会平啲，大约二百几至三百几。

至于其他Menu就坐边度都有，Set Lunch Menu有3个价位供选择，个分别就系一个系拣前菜或者汤，一个系一个前菜一个汤，最后一个系有两个主菜，全部都会包甜品加咖啡。

另外会有A La Carte Menu、signature tasting menu、dessert menu 同drink menu。

今次我介绍嘅系Set Lunch Menu同Special Tasting Menu，Set Lunch Menu入边嘅前菜同主菜会成日换，如果食唔到想食嘅招牌菜可以喺Special Tasting Menu度拣，基本上呢两个Menu可以试到八、九成嘅招牌菜。
-
1️⃣ Bread basket （👅: 8.5/10）

呢度嘅面包篮可以话系咁多间餐厅份量同种类最夸张，因为佢有接近10款面包，例如有brioches、法包、croissants、sourdough、咸火腿面包棒、果仁包、comté cheese bread、baguettes等，见到令人心花怒放。

面包每个比较迷你，食落去麦味唔算突出，系有少少咸香味加上丰富嘅牛油香，略嫌油腻左点。

咁多款最钟意迷你牛角酥、芥末烟肉包同芝士包，牛角酥算松化，牛油味重，咸火腿面包棒咬去脆口，食落有咸香味，芝士包一样食落有咸香味。

呢度嘅牛油系室温，食落去有咸味，系我最钟意嘅牛油，因为佢会令到面包嘅味道升华，不过呢种牛油最出色嘅系喺petrus。

记住唔好食晒呢度个面包，因为要留肚食之后嘅嘢，面包可以打包，店员喺你走𠮶时打包俾你。
-
1️⃣ Amuse Bouche （👅: 8/10）

七月份嘅Amuse bouche系西班牙冻汤配日本日本士多啤梨，会将茅屋芝士雪冻成一粒粒好似雪糕咁嘅形状，上枱个时有烟雾离漫嘅效果，真正嘅入口即化，舌头嘅温度令到芝士溶化系个口入边，加上士多啤梨冻汤，食落去酸酸甜甜，非常开胃，真系啱晒夏天。
-
Appetizers
1️⃣ Le Caviar Imperial +💰280 （👅: 9/10）
前菜首先介绍佢哋嘅招牌，系经典蟹肉鱼子酱配上龙虾汤啫喱，呢一款间中会系lunch Menu见到，不过就一定会喺speical tasting Menu见到，店员介绍佢会有三种嘅呈现方式，我好好彩第一次就食到佢最经典嘅呈现方式，就系系一只大嘅白碟，另一个系用一个透明杯，最后一个系会用一个鱼子酱小盒，上面就会铺满鱼子酱。

Le Caviar Imperial

菜式底层系龙虾汤啫喱，中间挖空放入阿拉斯加蟹肉，铺上鱼子酱后加金箔点缀，之后再加上椰菜花忌廉同香草蛋黄酱，一入口质地细腻，单品尝鱼子酱咸鲜味重，龙虾啫喱咬落爽滑，食落系香鲜，阿拉斯加蟹肉入口软嫩，食落鲜甜，配角椰菜花忌廉带小小清甜，不过当三层一齐食，层次分明，三重口感，味道层次丰富。一般食鱼子酱𠮶时会觉得鱼子酱个味道会盖过一切，不过呢度系用阿拉斯加蟹肉加上龙虾汤啫喱，啫喱会稍微中和左鱼子酱嘅味道，所以食起上嚟冇咁咸，蟹肉会吸收鱼子酱嘅味道，各种食材配搭起嚟，配合得天衣无缝，唔会相互抢大家风头，味道非常之顺口，会一啖接一啖，齿颊留香，真系会想将只碟舔干净。

如果要挑剔就系鱼子酱菜式无提供贝壳汤匙，而系用金属汤匙，因为用普通材质匙羹可能会破坏鱼子酱嘅味道。
-
2️⃣ Le Foie Gras （👅: 8.5/10）

呢一个前菜喺Special tasting Menu都有，唔系用Foie Gras Terrine呈现，而系以Chicken Galantine 嘅方式上菜，鸡肉同鸭肝经过慢煮，入口系偏硬身，食落去本身有少少油腻，配上黑松露酱同埋沙律，可以中和一下鸭肝既油腻感。
-
Hot Soups
1️⃣ Les Crustaces +💰120 （👅: 9.5/10）
呢一度可以话系全间餐厅我最钟意嘅菜式，喺Special tasting Menu都有。呢个法式马赛鱼汤系用上日本松叶蟹、龙虾同海鲜肴成，旁边伴以脆米虾球同墨西哥辣酱。

龙虾汤饮落去鲜甜，又带龙虾嘅咸香味，浓烈到非常冲击，如果唔钟意重口味嘅人可能会觉得太咸，但我就会忍唔到一口接一口咁饮。入边仲有唔少嘅龙虾肉粒，咬落去结实，入面嫩滑，不过龙虾汤嘅味道比起龙虾更加重，浓到好似系用十几只龙虾肴成，系我香港饮过最浓嘅龙虾汤。

隔离嘅炸虾球咬落香脆，不过对比起龙虾汤就比较普通啲。
-
Mains
1️⃣ Les Spaghettis +💰150 （👅: 8/10）

第一道主菜系呢度嘅招牌龙虾意粉，呢度招牌菜反而系用最简单直接嘅方法去表达。

意粉幼身，煮到Al dente，咬落去弹牙，不过可惜唔系手工意粉，龙虾汁用黄酒、虾膏去煮，质地比较轻身因为冇用忌廉，食落去有龙虾鲜味，意粉唔算挂满龙虾汁，因为酱汁质地比较稀，加上鱼子酱，层次丰富左，不过我觉得龙虾汤个味会再浓啲，重口味嘅我觉得酱汁味道比较淡啲，而龙虾肉用咗一只波士顿龙虾，够厚身大嚿，咬落去弹牙，生熟程度啱啱好，食落鲜甜，我觉得龙虾肉做得比龙虾汁出色。
-
2️⃣ La Caille +💰100（👅: 9/10）

呢一样招牌菜系世界各地好多robuchon嘅分店都有，系一道鹅肝酿走地鹌鹑，份量唔少，有三块鹌鹑胸肉同一只鹌鹑腿。

鹌鹑腿既外皮够薄身，咬落够脆，入边嘅肉够粉嫩，咬落去系偏扎实带爽口，够juicy，肉汁锁左系肉入面，因为系free range鹌鹑，每日有段时间可以走地，肉带小小膻味，不过酱汁食落去偏甜，同鹌鹑非常之夹。

但呢度菜好食在于厨师将鹌鹑胸去骨，酿入鹅肝mousse，慢煮之后再煎香外层，绝对系心机之作，加咗鹅肝嘅鹌鹑胸，鹅肝够肥美，煎得外层香脆，咬落柔软，因为鹌鹑胸肉偏瘦，一肥一瘦，两者相辅相成，味道非常之夹，口感更丰富，唔细心啲食根本分唔出入边系有两种食材，系两者平衡得非常好嘅一道菜色，因为法国菜最主要嘅精髓就系平衡。
-
3️⃣ Le Porc Iberique （👅: 9/10）

Le Porc Iberique

呢个系用西班牙黑毛猪，用铁板煎到半生熟，店员话呢一种系最高级嘅黑毛猪，因为佢系食食橡果，因为佢系medium rare，咬落去好嫩滑，而且肉汁够多，食落去猪肉味道突出，油脂唔会话太重，好食嘅程度绝对唔会输比牛扒，即使系隔离嘅蘑菇，都比预期中好食，尤其系下便嘅粟米粥，第一次食非常有惊喜，有啲似芝士但系系粟米嘅味道。
-
🥔 Mashed Potato （👅: 9.5/10）

主菜都会配Robuchon最出名即招牌薯蓉，大厨研发呢一个薯蓉系试咗廿几款薯仔，最后决定用一款喺法国北部出产嘅La Ratte薯仔，直到宜家都系用呢一种薯仔，因为佢口感丝滑，带好似栗子嘅香味。

入口非常幼滑，完全唔会见到任何粒粒，入口都系无颗粒感，系食过最绵密既薯蓉，好似食紧mousse咁，但又保持适当嘅湿润度，牛油味道非常浓，每食一啖好似食紧几盒牛油咁，但食落去又唔会觉得腻，反而系想一啖一啖食晒佢，但佢嘅薯香同埋奶香系平衡得完美，无论食几多次都系觉得好有惊喜，虽然佢嘅食谱已经大为广传，用四种材料同50分钟就做到，但佢嘅技术就唔系个个都做到，绝对系人生食过最好食既薯蓉。
-
Special Tasting Menu
1️⃣ Le burger 💰340（👅: 8.5/10）

呢一份系一个鹅肝牛肉汉堡，牛肉用上鹿儿岛和牛，汉堡大细恰到好处，一人一件啱啱好。

未食已经闻到鹅肝嘅香味，睇落去冇咩特别之处，一咬落去非常香口，面包有烘过，软硬适中，鹅肝够肥美，咬落去系软嫩无筋，而且多汁牛肉系非常粉嫩，咬落去juicy唔干身，食落去肉味重，整体系好juicy，因为份量唔多话所以食起嚟唔算好腻。

薯条系将薯仔手切成比较细条，配合返迷你汉堡，不过食落去就比较普通，因为唔够脆身，可能因为薯蓉太出色，配搭薯条嘅系姜味茄汁，不过食起上嚟都冇咩惊喜。
-
Dessert
1️⃣ Le Chocolat （👅: 9/10）

第一款甜品系榛子酱朱古力慕斯配伯爵茶雪糕，第二次先食到，不过几有惊喜。甜品嘅外型好似玻璃球盘景，打碎上面嘅朱古力就可以食。

朱古力慕斯入口即化，够creamy，食落味道浓郁，朱古力味道一直停留喺口腔，久久挥之不去，加上焦糖化左既榛子酱、朱古力脆脆同埋附近嘅果仁，口感非常丰富，最有惊喜系个雪糕食落去伯爵茶味突出，可以中和一下朱古力嘅浓郁。整体所有组合都好夹，层次丰富，钟意朱古力既人绝对推介，不过如果一个人食晒就会觉得有啲甜，适合同人share。
-
2️⃣ La Pomme （👅: 9/10）

Lunch Menu上面嘅甜品，我最钟意嘅一款，系烩苹果配云呢拿雪糕同苹果酒雪葩。

Apple Tatin绝对系一个好考技术既甜品，因为需要将苹果切到一片片非常薄身，苹果咬落去非常软身，食落去苹果味道浓郁，酸甜交集，苹果肉食落清甜，苹果白兰地酒雪葩绝对将苹果嘅香味倍添层次，加上云呢拿雪糕，整体唔会太甜，平衡得非常之好，如果要挑剔就系饼底偏硬少少。
-
3️⃣ La Framboise （👅: 8.5/10）

呢个甜品系开心果慕丝配红桑莓雪葩同脆脆，翠绿色嘅开心果慕丝呈半圆形，上面放咗红色嘅红桑莓，隔离仲有红桑莓雪葩，颜色分明，卖相唔错。

开心果慕丝咬落厚身，入口香滑，不过食落开心果味道唔算突出，反而杏仁味比较突出，上面嘅红桑子食落去比较酸，几适合中和一下主菜嘅浓味。

红桑子雪葩酸味都几突出，唔系个个可以接受，不过如果唔钟意食甜嘅甜品，咁呢个就会好适合。
-
4️⃣ Petite four （👅: 7.5/10）

七月嘅Petite four系马卡龙同咖啡朱古力，我觉得两者都比较甜，朱古力嘅咖啡味几重，不过马卡龙比起朱古力更加甜。
-
La Carte Des Desserts
1️⃣ Le Soufflé 💰220 （👅: 9.5/10）
跟住就拣咗喺La Carte既甜品，全部都系$220一份，我就叫咗呢度嘅招牌Soufflé，即叫即焗所以要等20分钟。

Soufflé整到好完美，热辣辣要趁热食，外表够滑溜，冇任何裂纹，够高身，外层咬落去脆，入面入口即化，非常软绵蓬松，摆系口腔会溶化，极轻身轻盈，空气感十足，入边系够湿润，但又唔会过分嘅湿润，口感拿捏得啱啱好，食落朱古力味道浓郁醇厚，同时蛋香味重，朱古力唔会过甜，都唔会死甜，亦都唔会话有好重苦涩味，系绝对可以接受嘅苦涩味，隔离嘅朱古力sorbet可以中和一下多余嘅甜味，整体系我食过最好食嘅梳乎厘，香港可以同佢匹敌嘅应该只有petrus同somm，如果钟意朱古力嘅人绝对要试。
-
2️⃣ Le Chocolat Sensation 💰220 （👅: 8.5/10）

Le Chocolat Sensation

上面嘅系一层好似纸咁薄嘅朱古力薄片加上朱古力粉，下边嘅系朱古力雪糕，再加上cream同朱古力脆脆，又系另一款朱古力嘅甜品，朱古力唔算太甜亦都唔会太苦，因为朱古力味道会同入边嘅cream中和。
-
Drinks
1️⃣ Cappuccino （👅: 9/10）

呢度既咖啡会有餐厅个名嘅拉花，非常适合打卡，咖啡上面有啲泡，入口厚身幼滑，够creamy，饮落去咖啡味道够香，带有少少甘甜，苦涩味唔重，唔算好苦涩，如果觉得苦，可以加上另外嘅自家制焦糖酱，咁落去别有一番风味，或者可以同Petite four一齐品尝，互相中和。
-
2️⃣ Chocolate （👅: 8.5/10）

唔可以睇小呢度嘅朱古力，因为佢系用66% Valrhona 制成，望落去色泽比较浅，奶嘅比例比较多，质地唔算好浓稠，都唔会挂杯，入口一开始有泡状嘅口感，饮落去饮到可可味，带有少少甜味，不过同时有果酸味，唔会太苦有回甘，虽然唔重，朱古力有奶香味不过唔会太甜，唔会话甜到好涸喉，系水准之上嘅热朱古力。
-
🌟 Robuchon 系四月换新主厨，系澳门天巢Robuchon分店既主厨Chef Julien Tongourian 黎香港坐镇。所以呢两次用餐食物质素出品稳定，保持水准。前菜方面最有惊喜系龙虾汤，因为佢系我香港饮过最浓郁，可以同佢匹敌既只有文华扒房，而佢个招牌菜鱼子酱前菜将三者平衡得非常之好，令人抛开有鱼子酱一定好咸嘅概念。主菜方面龙虾意粉我觉得意粉如果变做手工口感更佳，同埋饮完龙虾汤有对比，酱汁唔够龙虾汤浓郁，至于招牌既鹌鹑就可以食到佢同鹅肝嘅完美融合，无论味道上定系口感上，配菜嘅薯蓉更加唔使讲，robuchon甚至令到佢可以成为主角。而甜品最钟意当然系佢嘅招牌soufflé，因为佢系一样好难做到完美嘅甜品，香港做得唔错嘅就只有robuchon 、petrus同somm，三间同为香港嘅高级法国餐厅，不过佢嘅lunch Menu嘅甜品都有惊喜，尤其系朱古力同埋苹果塔，每一样菜式或者甜品都会有一个元素令你有惊喜。食过两次嚟讲，佢嘅招牌菜出品好稳定，绝对受得住米芝莲嘅荣耀。

饮品方面，如果你系叫Special Menu嘅话，咖啡同茶要另外加钱，大约都系60几蚊一杯，但我会觉得好值得，因为佢哋嘅咖啡同朱古力质素，唔会比出边嘅Cafe差，连饮品都咁讲究，绝对符合米芝莲三星餐厅嘅质素。

Lunch set menu，以米芝莲三星嘅餐厅黎讲，性价比好高，因为如果唔加钱嘅话，$1000唔使就食到，两次都加咗钱食招牌菜嘅我，就差唔多人均1000，晏昼已经可以试到招牌tasting menu嘅大部份招牌菜。

虽然lunch Menu会不时更改，不过special tasting menu同A La Carte menu就可以四季都食到。四个月内食左两次，我谂我要休息吓，因为等紧佢秋冬季嘅Menu，最想试嘅系佢秋冬季先有嘅栗子汤。每一年嘅Menu可能都会有微微嘅调整，不过主要嘅招牌菜式都会保留，彩色都系偏向法国菜糅合左少少日本元素。

Robuchon行既系系平平实实嘅法国菜，就好似佢既装修风格一样，食物方面都系化繁为简，每一道菜色唔会话太过复杂，都系用少少配角去衬托一个主角，唔会有好花巧嘅摆盘同埋好创新嘅呈现方式，你系食得出自己食紧啲咩嘅食材同味道，唔会好似食紧分子料理咁，喺系细节尽显功架嘅路线，由佢嘅多款面包，到每一道菜色，都可以睇到厨师花好多心思，令到你喺每一道菜色都会有一啲记忆，因为法国菜就系讲求唔同食材之间嘅平衡，唔会话互相争做主角，系你联想唔到两样有关系嘅食材，摆落口竟然系同一件事，个样就系法国菜嘅精髓。当然如果要挑剔robuchon，就系佢摆盘上嘅精致度同埋菜式创新个方面。

同caprice比较，大家都系好着重玩层次，从中揾出平衡，不过caprice可能会比较创新小小，好似将现代健康嘅哲学摆落去法国菜，即使用上海胆、鱼子酱呢一啲嘅食材，食落去唔会好似一般法国菜咁「重口味」。至于PETRUS都系喺传统上但有少少创新，喺法国菜融合少少日本菜元素，提供客人惊喜嘅海鲜菜式，但又无法国菜嘅油腻感。而robuchon相对系比较传统、稳阵啲，主打嘅系一致同稳定，但其实喺唔同季节下、唔同嘅主厨、唔同食材下都可以保持风格一致，绝对系佢呢一个连锁餐厅去到边个国家都可以攞米芝莲认证嘅关键，每一间法国菜各有风格，各有所好，因为每个人嘅接受范围都唔同，所以好难定夺边一间系香港之首。

服务方面，店员好详尽讲解每一道菜色，无论系每一道菜式嘅食材、佢嘅食法、菜式用嘅食材等，值得加分嘅系我女朋友第二次去𠮶时系有啲赶时间，因为食法国菜闲闲哋可以食三个钟，佢唔知可唔可以提出上菜快啲嘅要求，不过佢就喺Special tasting menu个到见到话”If you have a time constraint, please let your waiter know when you place your order”，所以佢就同职员讲，结果真系上菜速度比我同其他朋友快，无论系主菜定系甜品都比我哋快上，所以最尾可以赶上食完甜品就走，唔知其他法国菜餐厅可唔可以咁做，不过呢一间米芝莲三星嘅餐厅就做到，唔止系食物出色，服务都系点对点。而且店员会留意客人嘅用餐进度，会调整上餐速度，但又保留适当嘅空间，唔会好似某啲餐厅咁长期有职员望住我哋食饭咁。而基本嘅细节都做到，好似菜式同菜式之间都会换一次餐具。另外每次服务员都会帮客人打包面包，但佢留意到我同女朋友去食同一篮，而我朋友同佢妈妈系食另一篮，佢识得主动将两篮面包分开打包，系非常细心嘅举动。

听讲餐厅嘅sommelier非常专业，对于wine List同pairing非常熟悉，不过呢两次都系食晏昼，同埋唔系特别日子，所以就冇试到酒，下次可能系好机会。另外如果庆祝生日，可以订枱个时预留佢哋嘅招牌朱古力榛子蛋糕，而且店员会主动帮你影相。

环境方面，L'Atelier行时尚型格吧枱嘅路线，虽然佢冇好似petrus嘅海景，佢都唔系五星级酒店嘅餐厅，不过我系坐吧枱位，所以唔需要好注重礼仪，可以好似平时喺酒吧咁边食边倾偈，亦都可以同店员交流，而且可以观看到上餐同埋厨师料理嘅过程。而餐厅嘅厨房抽风做得非常之好，因为喺吧枱位，但完全问唔到厨房传出嚟嘅香味。另外我觉得吧枱呢度影相唔错，因为每张枱都有独立嘅射灯，因为有好多法国菜餐厅可能注重气氛，所以灯光就唔算充足。

总结呢两次嘅用餐体验都唔错，可以喺休闲嘅气氛下品尝到米芝莲三星嘅法国料理，出品稳定，喺一场味觉同埋视觉嘅享受、一餐色香味俱全既法国盛宴。虽然主厨Robuchon已不在人世，但佢嘅精神同埋创造菜式都会广为流传、流芳百世。
-
👅味道: 9/10
🍴环境: 8/10
💰消费: $780-1000pp (服务费: 10%)

(以上食记乃用户个人意见 , 并不代表OpenRice之观点。)

分享
推介

已推介
检举

张贴

评分

味道

环境

服务

卫生

抵食

用餐日期

2022-07-17

用餐途径

堂食

人均消费

$1000 (午餐)

推介美食