鮪世市場 (已結業)

我成日觉得，食寿司系最能够体会 “一分钱一分货”：你畀得起钱，自然较大机会食到新鲜啲肥美啲嘅好嘢；否则的话，你唔想破费，去争鲜食八蚊碟寿司，就要预咗食啲咩落肚😂。鲔世市场隐身于将军澳厚德街市旁，只有八个座位，系名副其实嘅小店。餐牌上最平嘅寿司九蚊起就有交易，价钱十分亲民，帮衬当日唔太肚饿，我拣咗八款寿司（三文鱼寿司，北寄贝寿司，赤贝寿司，酒煮荣螺寿司，特大赤海虾寿司，日本帆立贝寿司，火炙帆立贝寿司同蟹膏军舰），加埋都只不过系百松啲蚊，好抵食。店员落单后，随即开始制作，好快就有得食。说实话，以呢个价钱，食到呢种质素，我系绝对收货，因为所有寿司 size 正常，面头嘅刺身厚度亦正常，质素虽然讲唔上惊为天人，但都算新鲜肥美，绝对衬得起呢个价钱，比元气好百倍。唯一要改善嘅系饭嘅温度，可能因为啱啱煮熟，稍为热咗少少，呢度要留意返。