寶琳為食喵 (已搬遷) 新店位置

呢排捉得多喵喵怪，见到个舖头名都觉得好似有声咁！点解住西环嘅我会山长水远咁一路向北，黎征服将军呢？就系因为早几日见到Utravel有个post 介绍将军澳嘅隐世小店sss啦。我嘅第一站就系呢间宝琳为食喵啦!佢位处于宝琳邨嘅街市入面，冇乜方向咁嘅我一路喺屋邨嘅行人天桥度兜左好耐，先落到去地面，搞到零舍饿呀喂！街市入面都有好多唔同嘅食店，集中埋一齐。虽然话系街市，不过都算几整洁嘅，又唔会话好焗，所以堂食都okay。为食喵外面有2张枱俾人堂食，我知道呢度嘅瑞士鸡脾出名，但系太大只我又食唔晒，又想试下其他小食，所以我就叫左鸡翼芝士捞面同炸烧卖。鸡翼芝士捞面（$22） 啲鸡翼都系瑞士汁，啲鸡翼好深色，好入味，又唔会太甜。芝士汁系有少少似新记𠮶啲，芝士味都几重，不过汁嘅份量就少左啲。炸烧卖（$10/ 10粒）真系超抵，1蚊一粒烧卖真系边度有，仲要炸到外脆内软，洒埋啲椒盐，正，不过食完都几口干。食完呢两样嘢，本身想试埋隔离间宝琳粉仔，不过佢未开，唯有等下次啦！