我愛慢煮 (普慶坊) (已結業)

新年期间，食左好多好野，为左忍口，所以一直都无认真发掘新餐厅。终于….今个星期五解放啦~~!! 揾到上环有间新开既慢煮小店，于是相约朋友去试下。之前打电话黎，职员话一定要BOOK枱，但餐厅位置较静，而且唔系好起眼，我同朋友6:30黎到成为第一枱客人。不过，到左7:30左右，餐厅已经8成满，期间更有客人因无BOOK枱而摸门钉，所以想黎既朋友要注意啦。餐厅名为《我爱慢煮》，顾名思意其慢煮食物理应最为出色，当中唔少食客都推荐牛面肉同猪鞍。由于自己会慢煮猪鞍，所以今次无唔特登试佢。慢煮36纽西兰牛面肉 (10安士) $148由于整作时间颇长，以「天」作单位，所以慢煮食物价格一直都唔平，但完全无谂过呢个份量十足既牛面肉只售$148，份量已经超值!!牛面肉除左表面果层焗到干身而变硬之外，入面既肉连筋位都煮到好淋，一D都唔痴牙。肉质虽然唔错，但个汁杰得黎带点苦，加上牛面肉牛味唔够浓，师傅又无加调味料提味，食落个酱汁味太浓，食多几件就好漏。配菜就拣左个坊间少见既芋头蓉 $15而家系芋头当造期，意思芋味较浓、芋头较粉；呢度既芋蓉芋味算香，但餐厅为左增添口感而加入既芋头粒，质素就唔够靓、唔够粉、硬身左D。