影片
更多
2024-10-20
1731 浏览
遖 Sushi Apare📍尖沙咀漆咸道南115号达成商业大厦7楼本来打算趁重阳假期快闪一转台湾，但最终都因为种种原因取消计划，不过既然已经攞咗假，我同朋友决定久违哋食返餐おまかせ，好好farewell难得嘅四日连假。今次我哋到访一间邻近尖沙咀历史博物馆、座落一商业大厦内嘅日本餐厅，品尝令人回味无穷嘅日料。午市有两款套餐供应，价钱丰俭由人，因为想食多几款寿司，我哋都拣选咗较便宜、有12贯寿司嘅套餐。 💰$530昼の御品 👨🏻🍳茶碗蒸し 🥚磗红色小碗内嘅茶碗蒸滑嫩无比，表面丝丝分明嘅蟹肉不单提升口感，更令蒸蛋多咗一重蟹肉香气；蒸蛋内放有一粒清甜白果，更置有鲜美贝类一小粒。简单一个小碗，盛载住蟹肉、贝类、蒸蛋等食材嘅原汁原味，为后面嘅餐点开咗好头。握り寿し12 贯唔肯定有兴趣食おまかせ嘅朋友系抱咩心态去食，但我同朋友都不约而同哋因同一原因喜欢上食おまかせ—新鲜。我讲嘅新鲜除咗系食材嘅新鲜，亦指整个用餐体验。有一啲餐厅会用好抢眼嘅装置、好精美嘅摆盘作招徕，务求满足食客对新鲜感嘅追求；有一啲则会选择即场处理活生生嘅食材，为食客呈上最新鲜嘅餐点；仲有一啲餐厅，既无花巧嘅摆盘，亦无如同耍杂技般嘅
📍尖沙咀漆咸道南115号达成商业大厦7楼
本来打算趁重阳假期快闪一转台湾，但最终都因为种种原因取消计划，不过既然已经攞咗假，我同朋友决定久违哋食返餐おまかせ，好好farewell难得嘅四日连假。
今次我哋到访一间邻近尖沙咀历史博物馆、座落一商业大厦内嘅日本餐厅，品尝令人回味无穷嘅日料。午市有两款套餐供应，价钱丰俭由人，因为想食多几款寿司，我哋都拣选咗较便宜、有12贯寿司嘅套餐。
[价钱 Price]
💰$530
昼の御品 👨🏻🍳
茶碗蒸し 🥚
磗红色小碗内嘅茶碗蒸滑嫩无比，表面丝丝分明嘅蟹肉不单提升口感，更令蒸蛋多咗一重蟹肉香气；蒸蛋内放有一粒清甜白果，更置有鲜美贝类一小粒。简单一个小碗，盛载住蟹肉、贝类、蒸蛋等食材嘅原汁原味，为后面嘅餐点开咗好头。
握り寿し12 贯
唔肯定有兴趣食おまかせ嘅朋友系抱咩心态去食，但我同朋友都不约而同哋因同一原因喜欢上食おまかせ—新鲜。我讲嘅新鲜除咗系食材嘅新鲜，亦指整个用餐体验。
有一啲餐厅会用好抢眼嘅装置、好精美嘅摆盘作招徕，务求满足食客对新鲜感嘅追求；有一啲则会选择即场处理活生生嘅食材，为食客呈上最新鲜嘅餐点；仲有一啲餐厅，既无花巧嘅摆盘，亦无如同耍杂技般嘅料理过程，全程都只埋头用心处理食材、为食客递上食物时简而精地介绍、手起刀落地将客人面前嘅新鲜食材，转变成美味可口嘅餐点⋯⋯「遖」呢种唔造作、纯粹嘅感觉，对于我哋呢啲成日周围食嘅人嚟讲，实在非常新鲜。
个人认为食おまかせ另一个吸引点，系唔到𠮶刻都唔会知道自己会食咩，亦有好多情况系听完个名都唔会知道系咩味道，呢种无法预测嘅新鲜感的确有少少刺激，亦令多数只食虾类、贝类嘅我，有机会尝试多种鱼类刺身。
言归正传，接落嚟我会简单介绍当日食过嘅12款寿司，每款都以赤醋饭配师傅按时节严选嘅刺身手握而成，希望藉相片同食评同大家回味一番：
✿ 桜鲷
白里透红嘅樱鱼鲷片色泽鲜明清晰，带淡樱花色泽嘅外皮柔软，皮下油脂则风味清爽，整体肉质紧实，搭配蒽花更添滋味。
✿ 関鯵
深海池鱼片虽然脂肪结实、肉质肥嫩，但入口异常顺滑柔软。师傅喺生鱼片上放上紫菜酱，增加风味，越嚼越香，一股淡雅嘅油香填满口腔。
✿ アカガイ
首次接触紫苏花，淡紫色撞鲜橙色，形成视觉强烈对比，令赤贝寿司摇身一变成为艺术品，为视觉、味觉带来无比享受。除可观赏外，紫苏花亦系食用花，既有花嘅清香，又有比紫苏叶较淡嘅味道，非常特别。赤贝颜色鲜艳、肉质爽厚富层次，口感清新，食过都话正！
✿ スルメイカ
全白色嘅锡乌贼较一般乌贼硬身，而且乌贼味更重。呢件寿司最令体会师傅刀工，正所谓「刀工影响口感」，掌握好刀工切刺身先唔会影响其口感同味道。师傅喺锡乌贼上工整地𠝹上花纹，令将由渗透乌贼每一角。最大惊喜系喺乌贼刺身下包有赤海胆，双重滋味，双重满足，系我同朋友呢餐心目中排第二位嘅寿司！
✿ キンメダイ
金目鲷外皮鲜红亮眼，皮下油脂含量丰腴，多数会连皮一齐食。金目鲷刺身片肉质细腻，味道鲜美，而且有一阵淡香柚子味，令人印象深刻。
✿ 鯵
小池鱼肉质紧实爽口，油香适中，味道鲜甜，仲有些少麻油味，食落油而不腻，齿颊留香。
✿ マグロ渍け
酱油渍吞拿鱼特别之处系以酱油、味醂、昆布、海盐等保鲜熟性，令本身油脂少、筋部多嘅吞拿鱼变得柔软松化，提升吞拿鱼嘅香气，同时平衡鱼脂。师傅再喺鱼片上𠝹上几刀，令口感同层次都得以升华。
✿ 中トロ
即使中拖罗油分比大拖罗少，但仍有入口即融嘅口感，油香四溢且无筋，有丰富嘅鱼味，其味鲜甜无比，令人想一食再食！
✿ コハダ
小鳍又名小肌，属偏多细骨嘅青背鱼，一般都要靠盐同醋调味腌制，口感至得以变得滑顺、带有香气。师傅喺小肌鱼片上划上整齐、均等嘅花纹，令鱼肉入口时更能配合赤醋饭嘅味道，享受小肌独一无二嘅鱼鲜味。
✿ サンマ
有无谂过人称「日料烧物皇」嘅秋刀鱼，生食反而更好食？同大家隆重介绍，朋友心目中嘅MVP！正值秋季，秋刀鱼份外丰盈肥美，但仍然要够新鲜至可以制成刺身、寿司。生秋刀鱼片富弹性，为提鲜，师傅喺鱼片上放上取自同一条鱼嘅鱼肝，制成香味浓烈、入口甘香嘅秋刀鱼肝酱，入口非常惊人！当然，师傅亦提醒，可以先浅尝鱼肝，如果接受唔到佢嘅味道，就将佢拨开就咁食件寿司。
✿ 甘エビ
内有甘虾头膏
至于呢件甘虾寿司系我今日嘅MVP、number 1！甘虾既比甜虾鲜甜，肉质又比牡丹虾细绵，师傅更将同一只虾嘅虾头膏款上寿司饭上，令甘虾味道更上一层！
✿ 海胆寿司
产自北海道嘅秋山海胆颜色比一般海胆金黄、口感更幼滑，味道鲜甜甘香，无丝毫涩味。师傅喺我哋面前打开一板海胆，快手影张靓相后，就开始处理寿司。一片紫菜包裹住快要满泻嘅海胆，净系睇相都已经觉得好澎湃！
入口后感受到海胆creamy嘅质感，喺口腔内扩开嘅鲜甜，满足感、幸福感同步直线上升！
卷物
トロ手巻き
拖罗蓉拌有青葱、酸萝卜粒等，口感层次丰富，拖罗味道突出但不抢戏，强列建议大家一从师傅手上接到就要食，紫菜先会保持脆脆口感！
お椀
食尽12种刺身寿司后，店员为我哋送上一碗热辣辣嘅面豉汤，入口味道较清淡，带有海鲜嘅天然甜味。听店员分享，师傅会用加入鱼类熬煮汤底，难怪会有鲜鲜甜甜嘅味道。
デザート 🍨
最后嘅最后，餐厅安排用日本直送开心果雪糕作收尾。浓郁嘅既开心果味搭配啖啖开心果碎，非常滋味，为整个套餐画上一个完美句号。
张贴
