一鮮刺身壽司 (已結業)

作为呢一年来我收工嘅必经之路，呢间一鲜一直无留意到，多得佢呢个两周年酬宾嘅手写牌，终于吸引我第一次入去试吓，果晚七点几，入到去，装修以木为主，座位以bar台bar凳形式，面积唔大，但系几有居酒屋嘅气氛!第二朝唔使返工，梗系要开一支sake饮下啦，价钱由98-158，都算合理。师傅话时不时会入一批唔同牌子嘅清酒，果晚冻冻地，老细好细心，我地未问佢，佢就主动问我地使唔使整热支sake,呢支叫奥之松$98，兴热左酒香唔错，味道唔算辣口，配合埋炸蚝送酒，胃口开晒！个炸蚝$32蚊有五粒，全部即炸，蚝味好够，呢个价钱计超值，之后我同老婆散叫左十件寿司同埋吞拿鱼腩碎反卷。啲饭口感好好，夹起唔会散，啲鱼生食得出系新鲜嘅，三文鱼，带子，鱿鱼，甜虾都好正！北寄贝就普通啲。最后我哋要咗个鳗鱼饭，鳗鱼份量适中，咬落口感唔错，鳗鱼汁份量啱啱好，唔会搞到个饭太咸$58仲送野饮，晚市嚟讲算系咁啦！埋单$292有时间会再帮衬！P.S.下次要试吓加拿大海胆，隔离位个两公婆系咁话好甜