三尖外賣煲仔飯

营业中

休息中

香港人食煲仔饭一定系谂起庙街，不过去过都知环境卫生情况相当一般，去到都系食佢嘅风味。最近庙街附近向住弥敦道近宁波街就开咗一间三尖外卖煲仔饭，令你可以食到干净企理嘅煲仔饭，仲可以将风味带返屋企。煲仔饭都有好多选择，价钱亦唔贵。所有煲仔饭都系即叫即整，12分钟就拎得，真系快靓正。店内安装咗多个电炉，用嚟制作煲仔饭，非常专业。度身订造嘅纸盒，仲可以将煲仔饭保温达1小时。用锡纸兜装住嘅煲仔饭，够晒干净卫生。煲仔饭会另上豉油、葱粒同菜脯，自己点调味都得。第一次帮衬，当然系试吓最基本嘅腊味煲仔饭。呢个大肉肠系腊肉配腊肠嘅煲仔饭，佢嘅用料都几高质，食得出唔系平价嘅腊肠。正如佢宣传单张所讲， 饭焦香脆而不㶶底，真系一粒饭都唔会嘥。海味三宝就有海龙虾干、原粒元贝同丁香银鱼，海味充满咸香，而且带有鲜味，基本上唔使落豉油都已经够晒味。除咗煲仔饭，呢度仲有原味焗蚬，焗蚬份量一啲都唔少，而且只只都好新鲜，加咗少少辣椒份外惹味。好开心发掘到呢间三尖外卖煲仔饭，而家喺屋企都可以食到又干净又有风味嘅煲仔饭啦！