天鳥居酒屋

营业中

休息中

今日朋友远道而来，所以就带左佢去附近食岩岩开左一排既日本野。虽然呢间铺开左一段日子，但我都系第一次去食。铺头既坐位宽敞，枱都够大，一啲都唔会有挤迫既感觉。食物种类选择繁多，由锅物，串烧，到寿司，鱼生，都应有尽有。我本来身想食牛肉锅，但朋友麻麻地，所以最后叫左啲寿司同刺身share。串烧方面，烧秋葵几出色，烧得刚刚好，唔会太干，入面仲有水份，木鱼丝加落去几好食。串烧牛心未食过，所以就叫左黎试。口感都唔错，唔太似食紧内脏，几弹牙。盐烧厚切牛脷心正！厚切既牛脷好有咬口，而且佢系用最好食既舌心部份，虽然调味稍为咸左少少，但系都好好食。串烧鸡软骨正常发挥，咸咸地，脆脆地，都几好食。寿司方面，用料都尚算新鲜，唔会食到任何一款有腥味，不过我地都觉得当日既寿司饭湿左少少。另外我地叫左一个店员推荐既池鱼拼盘，包括左5件刺身，4件手握寿司同两件反卷。深海池鱼刺身几滑身，肉质都算弹牙，点一点酱汁食都几开胃，不过寿司同刺身既鱼肉都唔算好浓味。另外既反卷几得意，外面有啲脆脆既荞麦粒。