歐意餐廳 (已結業)

年初三行大运，行到嚟上水，见有啲饿就去屋邨商场揾间非连锁嘅茶餐厅医肚。舖面几阔落，目测有40个座位以上。下午茶餐牌都有几多选择，价钱相宜。原本拣咗滋味沙律系列，点知侍应话冇供应，就拣咗酸瓜沙律吞拿鱼牛角酥配薯角$28、芝士滑蛋蕃茄生菜牛角酥配薯角$28、沙嗲牛肉蕃茄浓汤通粉$31、脆脆奶油猪$19、香草鸡扒浓汤意粉$29，全部跟餐有热饮，冻饮加$3。柠檬水每杯都俾咗5、6片柠檬，好夸张。牛角酥个样唔多似牛角酥，个包唔热嘅，食落都算松软，吞拿鱼太多沙律酱，得好少吞拿鱼，相对地滑蛋芝士牛角酥好食啲。薯角即炸好味！鸡扒浓汤公仔面只有一块好细嘅鸡扒，味道还可以。最欣赏系佢个沙嗲肥牛蕃茄浓汤通粉，本身以为沙嗲同蕃茄嘅味道好似会沟唔埋，点知食落味道几好，仲好足料有好多沙嗲牛肉。脆脆奶油猪都算香脆嘅，奶油略嫌少咗啲。