Castellana Restaurant (已搬遷) 新店位置

为最竉爱嘅靓女舞伴暖寿，周三晚特选于一间新开嘅意大利餐厅「Castellana Restaurant」度撑枱脚。西餐厅位于铜锣湾高级食厦Cubus内，楼底高高，装潢简单但仍不失雅致。正门先有三个胡须厨师代表欢迎光临，可爱极！左边有个光鲜嘅酒吧区。中央则以透明玻璃酒柜作屏风，型格地间开窗边嘅半开扬式厢房。用餐大堂只有五张散座，拍墙一边有张长长嘅梳化，其余嘅厚垫椅櫈都好舒适。二人被安排入座其中一张圆枱，雪白嘅枱布上有条卷起嘅餐巾，摆枱设计简洁有特色。餐牌上以意大利文印出用餐日期，除咗代表餐牌每日印出之外，其实亦意味著菜式会随住时令食材及海产而作出即日改动。封面清楚道出餐店理念，菜肴均由新进星级厨神Marco Sacco先生重新演绎传统嘅皮埃蒙特料理。如果对黑松露有兴趣的话，食客可以$5/克享用鲜刨黑松露。两口子应外籍哥哥推介，一同点选咗七道菜晚餐「Un Assaggio Del」。点好菜，姐姐仔先续一斟出特纯橄榄油，准备稍后配面包食用。晚餐先由是日开胃前菜「慢煮牛舌伴红菜头」作序。爽润嘅慢煮牛舌小件上以鲜美嘅红菜头蓉及巧脆嘅饼块点缀，黏上碟上嘅及红菜头粉末即能增添口感，微酸带甜，轻盈可口。