川粵小食 (已搬遷) 新店位置

呢間小店其實都幫襯左大半年，主打川式米線及飯，平均三十幾蚊，以材料味道嚟計絕對係誠意之作。早排見佢地開埋夜市，夜市祇做川式乾鍋及串燒，就先試下佢地嘅乾鍋。兩人餐可選三葷兩菜，肉類有豬大腸、肥牛、雞軟骨、魷魚鬚、排骨 ......（仲有好幾樣）；而菜就有金菇、蓮藕、豆角 ......（又係仲有幾樣），另送飯同汽水。味道有孜然（唔辣）、香辣及麻辣，當然可揀大中小微辣啦，今次我就試大腸、肥牛、魷魚鬚、豆角及蓮藕，麻辣小辣。雙人餐個份量都好足下，除左揀嘅材料外，仲有洋葱同蒿筍，味道唔錯，夠惹味，麻辣度適中，配飯無得彈，絕對會番轉頭幫襯。唯一唔好就係間鋪太細，得兩個堂食位，不過見到佢有摺檯凳，可能夜 d 會有開埋堂食掛？