FAB Kitchen (已結業)

荔枝角工厂大厦隐藏左一间私房菜西餐厅，有阔落座位，精致嘅西餐，叫左2个 3 courses set dinner $358. 可以试到6道菜。巴拿马芝士薄片配薯蓉汤，滑溜忌廉薯蓉汤，加上烤过嘅芝士薄片，配搭好夹，系一个温和幼滑嘅开始。牛油粟米泡沫配加拿大海胆，牛奶泡沫之中加入爆谷，配上加拿大海胆，爆谷香味配上海胆鲜味，系味觉新冲击。意式鸡肉卷配花雕汁，鸡肉够滑，带花雕香味，系中西fusion 嘅成果。泰式软壳蟹配牛油果，另一款fusion 菜式，软壳蟹香脆，牛油果混入蕃茄肉同芒果汁，口味清新幼滑。牛油南瓜白菌素食忌廉芝士卷，千层面卷入忌廉菠菜，加上忌廉蕃茄汁芝士烤焗，口感幼滑，配上牛油南瓜，钟意食千层面嘅话一定要试试。西班牙猪柳配迷迭香，意大利芝士酱，紫酸菜，猪柳嘅猪味好香，肉质嫩滑，配芝士酱令口感更加幼滑，配德国式嘅紫酸菜，可以开胃减少油腻感。餐饮可以拣咖啡或者英式茶包，食饱可以慢慢饮杯英式茶，最适宜做朋友放工聚脚点。