甜入心 (已結業)

假日饮完茶想食个甜品，揾到呢间系九龙湾淘大的甜品店。甜品种类好多，有中有西，总有一样啱心水。可能时间早，冇乜人，坐落几舒服，有啲吊椅，布置几girly。呢度仲有免费果茶任饮，系桃茶，桃味好浓好香，但唔甜，啱哂食完甜品清一清个口。鸡蛋布丁好菂式，蛋味浓，甜度啱啱好。质感比较实，好creamy浓厚。呢个椰皇非常出色，佢有好多咖啡啫喱，焦糖布丁好滑亦好有蛋味。个椰皇里面系椰子啫喱，好香椰子味，三样野一齐食超好味！有少少咖啡香再加上椰子的甜同布丁的蛋味，估唔到系咁夹！食完仲可以刮埋旁边啲椰子黎食，食清光！呢间小甜品店质素唔错，几有新鲜感，主打的椰皇放左布丁几特别，推荐！