野郎Stone (已結業)

今晚OT到好夜，想对自己好少少，就嚟咗间一人铁板烧叹吓。有啲似日本拉面店咁，门外有自助售卖机，可以用卡买定先，或者入店内用现金俾钱。 大部份部位都熟口熟面，就拣咗平时比较少见嘅翼板。一上枱就觉得块肉好靓仔，煎到微微金黄，仲有黑椒同蒜片。 本身块铁板好热，食到尾都仲系渣渣声，所以店家图文并茂教客人逐块咁切落嚟烧到想要嘅熟度，不过我比较懒就一次过烧，然后放喺碟上面慢慢食，以免过熟。虽然价钱只系一百头，不过翼板同我平时系西餐食到嘅靓牛扒差唔多，嫩滑有油香，即使手势麻麻地，煎到近乎全熟都仲系好腍，牛味浓郁，性价比奇高。转套餐可以拣饭、意粉或者薯蓉，薯蓉几幼滑仲有少少饭素调味，可惜原来系冷盘，冻食冇咁饱肚，下次都系拣返饭或者意粉好啲，整体值得Encore。