棕櫚閣西餐廳

营业中

休息中

每次搭车返屋企都会经过嘅一间酒店，相信大家对呢间酒店一定唔会陌生。不过讲开香港好抵食嘅自助餐，呢到一定系其中一员。$400松啲又有龙虾又有鹅肝食，相信外边都唔会有太多自助餐可以做好到。九龙维景酒店出呢个龙虾恋上鹅肝海鲜自助晚餐，可能你食完未必会超赞好𠮶种，但系坦白讲以一个相对平嘅价钱，都算可以接受。尤其系屋企人最钟意呢啲平靓正嘅选择，就好似屋企人有一班退咗休嘅朋友劲钟意童军总会自助餐。当然你话呢啲系好正嘅自助餐就一定唔系，但系一班人食得开心都几好。睇下有乜好食，朋友话法式海鲜红花浓汤好饮，呢个相对来讲都系几特别嘅，未饮过呢个味嘅海鲜汤。奉送香槟汁龙虾一客，呢个绝对系今晚主角，都几大只，又几好肉。香煎法国鹅肝都不错，爱鹅肝的我如可以吃多旧就好。刺身方面，种类唔可以话系好多，但系质素不错，又有吞拿鱼、蟹籽、三文鱼手卷等等。冰镇海鲜吧有大部份平时见到嘅蟹脚和虾之类。熟悉种类唔算话好多，有菜有肉有意粉，一定有一款啱你心意。甜品少不了Movenpick雪糕，又系食两杯都值回票价。而家优惠净价，成人一位 $398 ，小童$268而长者$338，价钱非常之适合一家人嚟食。