亞潘泰國菜

营业中

休息中

早排去完泰国旅行，特别挂住泰国菜，所以同屋企人一齐去食泰国菜。呢间舖头虽然细细地，装修亦好似普通茶记咁，但食物嘅质素好好，亦都似系泰国人打理，嘢食都比较正宗。呢个泰式炒面好足料，好似张图咁见到有炒蛋、虾仁、芽菜同葱。味道偏甜酸辣，加左柠檬汁之后个酸味会更加强烈。好似普通泰式炒面咁，啲面条会比较淋淋啰啰，一个人食应该好饱。我特别欣赏佢炒熟左啲芽菜，因为有啲泰国人会摆啲生芽菜喺泰式炒面隔离，食落去都几唔夹同埋有草青味。当然每个人对食嘢嘅感觉系唔同，我比较钟意熟嘅芽菜。第二样叫左我最钟意嘅木瓜沙律。呢个沙律佢整得都几辣，建议唔食得辣嘅人唔好叫呢个。就算平时好食得辣嘅人，都记住同佢讲小辣。呢次我系冇嗌小辣，食到喷火。但系木瓜沙律嘅口感好好，同花生、番茄仔、少少生菜夹埋一齐，食落去好清爽，亦有饱肚感，同时又几健康。