1988 (已結業)

周一腹话下昼要去观塘开会，6点前可以走得，系好机会出街食饭，观塘啲工厦开左好多食肆，虽然好多多国菜餐厅有好高评分，不过我对多国菜无咩兴趣，所以就㨂左呢间泰菜，好在我都有细心阅读其他用户嘅食评，话晚市walk in 系无位嘅，订左6.30pm,餐厅唔大，去到已经半满。一个星期前已经决定食1988，一早熟读左餐牌同食评，坐低就即刻叫左凤爪沙律，黄咖哩牛腩，蒜蓉法包，椰汁鸡汤，炒椰菜苗，炸虾饼，之后再追加炸鸡翼。最先黎嘅系凤瓜沙律，果然份量唔细，凤爪好多，唔系好辣；之后系炸虾饼，质地弹牙味道又够，入口唔会太油；蒜蓉法包外皮焗得好松脆里面软熟，蒜蓉无打得好碎，食到一粒粒；椰汁鸡汤系浅浅嘅白色，因为我平时好少点椰汁鸡汤，所以唔知浅白系咪正宗嘅，饮到有椰汁嘅味道，最得意系饮完之后个口有种甜甜地系口腔停留，椰菜苗一直系最爱，份量好足。黄咖哩牛腩，咖哩好香，牛腩份量好足，因为我唔食牛，听周一腹讲，牛腩好淋有牛味，最后追加嘅脆脆鸡翼到啦，果然同其他食评讲嘅一样，外皮好脆，鸡翼好够味，唔系迷你鸡翼，好在最后决定追加呢个鸡翼，真系必选。两人埋单$500，畀周一腹笑我点菜太凶狠。最后想赞职员服务态度好好。