海灣茶居 (已結業)

平时一班同年纪嘅人约埋去食饭，最多就系去Cafe，几十年前一班年青人约埋去食饭，应该就系去饮茶。如果饮茶系一件年轻嘅事，其实就应该好似呢间茶楼咁。光猛阔落、坐得舒服。枱枱凳凳碗碗碟碟都干干净净，而且啲点心影出嚟应该要四四正正，可以摆上IG打卡。而家好多老式酒楼，啲点心都系工场中央整定然后送到酒楼翻热，呢啲真系食得出味道唔同。今次呢间点心店，我哋一共嗌咗八样嘢，非常丰富，但系买单到时系两个人$264 ，而且点心都系好精致，新鲜滚热辣咁出炉。例如腊汁香酥肉饼就好睇得出点心师傅嘅功架，皮薄、肉嘅调味好惹味、啱啱好熟但又保持到肉汁。虾饺王亦都好值得一试，虾肉饱实，真系可以用皮薄馅靓去形容。最估唔到就系有以前去开莲香楼食嘅怀旧鹌鹑蛋烧卖，其实莲香楼都系食个情怀，而且而家都执咗，可以喺呢度试返鹌鹑蛋烧卖真系除咗好好味，仲好惊喜。