春田冰室

营业中

休息中

呢日沿马头围道向土瓜湾方向行，接近两点嘅时间，见到呢间嘢嘅装修几四正，望入去仲有卡位添，一于行入去，试下佢啲嘢得唔得，点知一入去就已经系伏，畀个侍应截住问几位，知道我系单身一个就叫我坐櫈位，我已经有啲唔开心，但一场入到嚟，又未帮衬过，即管睇吓会唔会系开心大发现，点知结局都系我判断错误。我拎住件大褛，咁当然拣4人櫈位嚟坐，好嘞，隔咗无耐，又有人入嚟，我又要被搬窦坐两人櫈位，无计。睇下个餐牌，常餐沙嗲牛肉面配炒蛋多士都要$54，下午茶要两点半先至有，唯有叫个午餐试下啦！拣咗莴笋牛肉饭，配热奶茶，$58。奶茶惯例先嚟，我亦惯例落啡糖，饮落味道正常，无惊喜。至于莴笋牛肉饭就同我要求有好大落差，首先一口咬落牛肉度，就明显感觉到落咗唔少苏打粉，不过唔紧要，我明呢个系厨房一贯做法，虽然我唔太喜欢；伏点系起甘笋同莴笋度，两样都系爽口，尤其是甘笋，而我就喜欢食腍身。所以呢间餐厅，我谂我唔会再有兴趣去试其他，即使佢几旺场都系咁话。