芝C Sushi (匯景商場) (已結業)

落开蓝田探个朋友，佢话呢头只系得一间真黄店，食寿司既，问我制唔制。咁我好明白系蓝田咁蓝既地方，开大道门做黄生意系难既，呢区无咩选择都可以理解。虽然我唔系咁好食生冷野，但过去支持下都要啦。一间细细既舖面入面企住三个黑衫叔叔，面门好多黄贴纸啊文宣咁，正中间有一个记者figure，好型！佢早由612开始已经疯狂罢市，11月西湾河果次出post讲睇到新闻唔开心。同香港人企埋一齐，我地都会同佢企埋一齐！$44 芝味加拿大海胆手卷$38 芝C卷海胆鲜甜，芝士味好香，食到落最底一啖饭都仲有芝士系到，正！见佢连舖名都叫芝C，知佢主打芝士就嗌个芝C卷。可能食完海胆再食佢，好食但无咁大惊喜，不过都好足料。无端端系腰间窜左一个小妹妹出黎，佢拎住张廿蚊纸细细声讲唔该苹果绿茶。黑衫叔叔第一次唔系咁听得清，问妹妹系咪要xxx啊？见小妹妹无扤头确认，又口擘擘细细声讲野，叔叔即刻走去收银bar枱闸门下面个窿到捐个头出去，好耐心温柔咁问小妹妹想要咩。真系估唔到叔叔原来系个暖男。好人一生平安。