Three Dice Kitchen (已結業)

同朋友行湾仔openrice到呢间餐厅，每一道菜都前所未见，决定一试。餐厅同地铁站有啲距离，需要行好多段天桥一条驳一条先到达。开放式嘅设计好通风，藤蔓台凳有种田园清新嘅感觉。蓝蝶系列特饮非常吸引，我同朋友叫左蓝蝶柚子蜜同星空特饮。星空特饮注明会变色，原来系将柠檬汁加入饮品当中，就会由深蓝色边为枣红色，好神奇！味道酸涩开胃，值得一试。龙蒿芥末芝士伴低温慢煮三文鱼-果然低温慢煮嘅三文鱼肉滑多汁，外皮煎得香脆，入面嘅三文鱼香味同海水嘅咸味保留得最完整。加上切碎嘅龙蒿，鱼味更加香浓提升。薯蓉打得软绵，香滑松软嘅质感加上浓香嘅三文鱼肉简直一绝。特别好奇嘅系多次系网上见到日式嘅透明果冻，而呢度有三种口味可供选择。玫瑰果园味真系正！玫瑰草莓糖酱甜而不腻，加上原本无味但口感爽滑嘅果冻融合得天衣无缝，加上旁边香脆嘅分子冻干红桑子粒，咬开爆出一丝红桑子酸味，非常有新意。