Lúa (已結業)

好幸运坐到喺阁楼灯笼座位，谂起5年前喺越南会安见到嘅感觉，夜晚吹着凉风，非常舒服。最特别系呢度嘅扎肉、肉丸、春卷、辣椒油都系越南工场自家制造，无添加，真材实料，梗系要叫下相关嘅菜式。我哋试左自制牛扎肉串烧（可选辣或者不辣），小食自选拼盘，顶级炉烤羊肉串、潘切直送小墨鱼春捞檬（小辣）。自制牛扎肉串烧（辣）一食落口已经食到好爽口弹牙，牛味浓，配埋少许嘅辣汁，好惹味。小食自选拼盘拣咗即叫即制手工粉包2件、柑桔汁鸡翼、猪肉春卷，晶莹剔透既粉包好足料 - 入面碎猪肉、木耳、虾米mix埋一齐，口感丰富，粉皮好滑溜。鸡翼炸得非常香脆，咬落去有肉汁，配埋酸酸地嘅柑桔汁解腻。猪肉春卷都系自家制，咬落去好松化，皮薄馅大。顶级炉烤羊肉串食落去完全冇羊臊味，外表焦黄油亮，独特嘅腌制材料令羊肉串入口更香。潘切直送小墨鱼春捞檬（小辣）我第一次见呢种配搭，即刻叫黎试试，细细只嘅墨鱼仔食落去好滑，配埋捞檬好清新，加咗少少放系枱面嘅辣酱，辣将辣味香浓，有少少香茅、蒜及虾嘅香味，钟意食辣嘢嘅朋友记得要试佢哋嘅辣酱。