御膳

营业中

休息中

嚟到位于观塘区工厦中嘅御膳，入到去个环境都几光猛企理。可能有唔少人觉得去食私房菜都一定要好大班人去，但系呢度除咗大圆台之外，其实都有啲细细哋嘅小圆台。订台𠮶阵只要同佢哋讲好人数同饮食喜好，佢哋就会安排菜单，同埋会晌事前用whatsapp确认，所以好似我哋咁得两个人嚟都冇问题。佢哋都有啲散叫菜式，不过我哋想每款少少哋咁试多几样，所以订台时就拣咗试套餐。豆腐大蚬汤，汤色奶白，饮起上嚟有芫茜清香。我个碗入面有三只蚬肉，豆腐亦滑溜溜嘅。麻辣手撕鸡，加咗啲青瓜丝晌手撕鸡入面，再捞埋麻辣酱，惹味得来又唔会太辣。金丝翡翠凤尾虾，虾肉厚身，仲有节瓜同花菇，味道够又唔会过份浓郁。蒜蓉粉丝蒸蛏子皇，蛏子皇弹牙，蒜蓉等配料令佢更加甘香，底下嘅粉丝就吸满蒸煮时释出嘅精华。大肉蟹，单系烹调方法已经有花雕蛋白鸡油蒸、姜葱炒、避风塘炒、四川香辣炒、胡椒炒五款，我哋想食比较原本嘅风味，于是试咗花雕蛋白鸡油蒸。蟹肉蒸得啱啱好，食起上嚟鲜甜，蛋白嫩滑有微微花雕香。花雕蛋白蒸龙趸球，烹调方法同大肉蟹一样，龙趸球肉质软绵，鱼皮滑嘟嘟。我哋都觉得花雕同海鲜几夹，唔会喧宾夺主之余又可以提鲜。蒜片牛柳粒，牛柳松化有油香，蒜片脆口。