佳佳粉麵店

营业中

休息中

食车仔面，最好系多𩠌拣、少味精、叹住冷气食、好味道同埋价钱合理。揸住呢把尺嚟食，开心指数都好高，系第一次嚟𠮶阵唔知规矩，有啲迷。规矩就系入到舖头，唔使自己揾位，店员会编排你坐边（单拖嚟食，次次都系坐同一个位）；嗌晒𩠌，唔使自己攞碗面返埋位，店员收咗你钱后，会送碗面去到你个位，跟手找钱俾你。心水推介车𩠌系酸斋（比湾仔的立食店更出色）、咖喱鱿鱼、凤爪、鸡肾，同埋枱面樽辣椒油。佢同面档加的辣汁完全唔同。辣汁唔辣，功能系制造浓香味，想食辣，就一定要加辣椒油，佢唔系好辣，加少少，碗面都会好味啲。注意返，牛筋系爽筋、猪肠系厚身版、一碗四𩠌米带来七分饱、近门口的座位唔系咁凉、老板偶尔会同熟客以最地道的广东俗语大声交谈（充满本土特色）。门口部旧汽水机，贴在墙身的发黄价目纸，都系特色。呢啲怀旧味，会吸引你间唔时返嚟帮衬。