Hungry Monkey (海之戀商場) (已結業)

久违嘅周围食，今次去到荃湾海之恋，见门面几有格调，决定试下佢。餐厅主要以铁板煮食，坐Bar台一边欣赏师傅烹调一边享用美食确系别具风味。蕃茄蒜子沙律原只光滑番茄，入口有种淡淡蒜香，配合埋番茄爽脆口感，同淋咗浓郁得来又好refreshing嘅酱汁，带俾人一种醒神开胃嘅感觉。冰头渍比较少试嘅菜式，佢系三文鱼头软骨。咬落有点嚼头，友人觉得口感似海蜇，味道酸爽，食完隔阵仲有阵油腔，绝对系特式开胃前菜铁板蛏子肉质十分爽弹，肉地好厚，调味唔需要太多已经品尝到十分鲜甜。铁板帆立贝有种酒香，口感刚好，唔会太熟，少许辣味同脆身炸蒜绝对能令鲜香提升。A5和牛坑腩炒饭铁板锅气十足，上台香气四溢，食落米粒分明，牛嘅精华完全渗入饭内，有股牛脂香包裹住每一粒饭。最后仲叫咗啲甜品，马卡龙口感好好同酒店水准可以媲美，铁板疏乎厘好有特色，松软唔会过甜，食完都无咩负担。