越男仔

营业中

休息中

今日无煮饭，就在屋企附近食晚饭。呢度有间越男仔，又未食过，咁老公就话不如食吓。餐厅灯光淡黄，播放住越南歌，环境干净整齐，坐得舒服。餐牌选择都几多，老公发办叫左佢钟意食嘅烧鸡，另外串烧拼盘同捞金边粉。原只太平烧鸡：烧鸡先原只上枱，职员先倒酒，然后再点火。火烧得都几劲，其他客人都有望，都几吸引。烧左一阵熄左后，职员问我哋切唔切，唔切可比手套撕黎食，我哋拣切会方便D。烧鸡热辣辣，皮够薄，咬落脆，肉嫩带肉汁，腌得入味，只鸡又唔算多脂肪，好好味。秘制沙嗲串烧大拼盘：除左猪牛鸡各两串，另外仲有菠萝。肉类烧得好香口，入口juicy，点埋秘制沙嗲酱就更加好食。而烧过菠萝亦够甜，好多汁，几好。蒜蓉牛油双虾扎肉捞金边粉：虾大只，食落带鲜味，面层铺满牛油蒜蓉，两款味道又夹又突出，另外虾头炸过，都几多虾膏㖞，好够味。扎肉亦有煎过，有香味。金边粉较烟韧，米味香，里面仲有生菜，爽口。整体捞埋甜酸汁一齐食，酸酸甜甜，又几开胃。