OPPA韓國燒肉店 (已結業)

近排因为武肺既关系，真系好少约朋友出街食饭，无见朋友咁耐终于近近地约出黎食野，最后决定四个女仔食韩烧，谂住呢段时间应该无咩人出街食，点知都几多人帮衬。餐厅环境好有韩国风味，而且仲有几部电视一路播住k-pop MV 气氛好好。坐低无几耐就黎左条五花腩，我初初见到咁多肥肉真系好惊，但烧完之后啲油出晒嚟，食落口系唔会觉得肥腻而且仲好好食，可惜我挂住食唔记得影相。再嚟就系主角，呢个拼盘有齐唔同国家既牛包括A4黑毛和牛肩肉、A4黑毛和牛三角腩、澳洲和牛脷、澳洲和牛下腩、封门柳、鹿儿岛牛柳粒、加拿大牛排骨、无骨牛肋肉、美国牛小排，埋单每人三百蚊唔驶就食到咁多牛其实都真系几抵食，而且牛味几浓，唔系cheap cheap牛，雪花纹都好平均所以入口好淋好正。韩式炸鸡新鲜炸起热辣辣，少辣，咬落口仲好juicy，肉质系好滑好好味。而韩式炸酱面系我朋友叫既，佢话味道唔错。另外我叫左个传统石锅饭，因为我一定要食啲饭落肚所以叫左呢个，呢个有惊喜，饭黎到时系好足料，有少少辣，饭够热好好味好满足。整体黎讲，呢度既牛好有水准，连生菜都好新鲜，除左牛，最欣赏系个石锅饭同炸鸡，因为真系好好味。