百樂門宴會廳 (已結業)

以前喺观塘返工，因为佢啲点心质素唔错，性价比高，成班同事间唔中都会去呢度饮茶。呢晚见到apm超多人，唔想呆等位，突然谂起佢，于是过去睇吓有冇位，出乎意料，一去到就有位，见到晚饭时间，全场得9枱客，真系生意难做。个人好钟意食生炒骨，是日叫咗碟蜜桃生炒骨，啲猪肉无膻味，唔肥，生炒骨外皮仲有少少脆，但又唔系好硬身𠮶种，换咗蜜桃配搭，有新鲜感之余，味道都几夹，献汁酸酸甜甜，唔会好稀水汪汪咁，唔油腻，好味! 凡惠顾正价小菜，就可以用优惠价点指定菜式，于是就拣咗清蒸沙巴龙趸，鱼蒸得刚刚熟，火喉控制得好，条鱼食落有鲜味，啲肉仲好滑，配埋甜甜哋有葱香味嘅豉油，好送饭呀! 饭后送咗红豆沙，味道普通，但唔太甜，作为呢晚嘅总结。