中環茶記 (已結業)

今日夜晚嚟到中环，见到呢间餐厅价钱比较经济，装修又几得意，于是入嚟试吓。餐牌就系茶餐厅+大排档嘅嘢食，有三文治、小炒，仲有类似打冷嘅卤味。叫咗一碟椒盐鲜鱿，出乎意料好食，粉浆好薄，唔会食到成口粉，椒盐好惹味，亦冇一般大排档咁咸，比较健康。另外叫咗一碟上汤浸时蔬，拣咗白菜，味道正常。见店内大力宣传咸蛋流心西多士，所以叫咗一份做甜品。有少少失望就系个咸蛋完全唔流心，好彩味道好浓郁，同西多意外地夹，做饭后甜品非常适合。饮品叫咗杯冻奶茶少甜，饮到最后难免比较淡，建议餐厅可以试吓整冰镇奶茶。另外要特别赞侍应非常有港式人情味，我多嘢拎佢就主动俾张凳我放袋，又会建议我哋将西多留返最尾先落单当甜品食，上完菜又会问吓我哋觉得好唔好食，令成餐饭嘅满意度提升唔少。