海灣茶居

营业中

休息中

呢日同朋友行经大角咀港湾豪庭，见到商场角落呢间新餐厅做紧下午茶点心特价，见价钱唔贵就入去试下啦。 被安排坐近窗卡位，落地大玻璃望到街景，感觉好写意。 我地主攻下午茶精选: 💫田园野菌炆米：好够味。米粉Q爽。个人认为可以再炆耐少少。分量超多，两个人share 好够食！💫古法马拉糕：又松软又有弹性，口感软熟干身。💫菘子素粉果：粉果皮烟韧， 葱，菘子，花生，芹，芫茜各款馅料味道丰富。💫五福临门点心拼盘🥢瑶柱鲜虾菜苗饺：饺皮够薄弹牙，饀料入味，菜苗翠绿新鲜。🥢烧卖啖啖肉无乜肥猪肉，肉质几弹牙。🥢潮州粉果同菘子素粉果一样，粉果皮烟韧，好足料，口感丰富。🥢两款包都系的的式式，流沙包一撕开咇晒啲咸蛋黄出嚟，咸蛋味好浓；蚝皇腩叉叉烧包入面个叉烧系半肥瘦，唔会过干或者得肥肉，蚝汁爆酱，食得好满足。 💫街边车仔肠粉：皮够薄同滑，不过稍为淋咗啲。💫花生糖不甩：用咗姜糖水去煮个糯米团，味道唔会「死甜」，有淡淡嘅姜味，再加上椰丝同粗粒花生，口感软糯有咬口。点心选择同普通酒楼差不多，价格仲好亲民，午市茶介$5/位，下午茶只收$3/位😱，另外下午茶有十几款点心做特价即叫即蒸，，店员都好nice，行过不妨一试。