明廚小炒私房菜 (已結業)

黑蒜茶树菇三黄鸡炖汤系全晚最有惊喜嘅菜式，唔好谂住黑蒜茶树菇呢啲普通嘢就冇乜特别，真系冇谂过可以咁香，一拎到入嚟揭开个盖已经香气扑鼻，而且非常足料，啱晒我呢啲钟意食汤渣嘅人，呢个炖汤真心推介。原个菠萝咕噜肉造型精美味道不错，咕噜肉嘅size比较细但系又做得到外脆内软，另外𠮶个猪肉似乎系新鲜猪肉，所以味道特别好。荷香古法蒸白鳝做得好好，食得出白鳝好新鲜，肉质有弹性而且无泥味。椒盐赖尿虾$120一只又真系几大只几新鲜盐焗奄仔蟹就有少少失望，可能未系时候，过多一两个月食奄仔蟹应该更加理想，不过我系拣咗平𠮶只奄仔蟹而唔系拣贵𠮶只。鱼扣脆骨腩煲系朋友推介一定要试嘅，真系非常之精彩，鱼扣再加脆骨腩呢个配搭真系冇得输，虽然佢个汁煮得好入味，但系又冇掩盖到佢嘅鲜味，真系好考厨师功夫。佢个鱼扣虽然已经切细粒咗，不过估计到佢原先嘅size系非常之大嘅，所以个口感烟韧得来亦充满咗骨胶原。腊味煲仔糯米饭又系好正，净系腊肠同润肠已经值回票价，佢哋选用嘅腊味质素非常之高，食得出厨师同埋老板对自己嘅出品都非常有要求，唔会求求其其煮啲嘢出嚟俾你食。另外再加了椒盐豆腐同啫啫通菜煲，都好食。