金滿膳燒味餐室 (已結業)

今晚妈咪偷懒唔煮饭，我哋就落楼下睇吓今晚食咩，见到好耐冇食烧味饭，又见到几多街坊到食嘢，就决定求其拣呢间餐厅食我哋嘅晚餐。入到去就叫左冻奶茶同樽装可乐。佢哋杯冻奶茶都冲得几好，奶味同茶味啱啱好，又唔会太甜。可乐嘅话，唔知点解我成日觉得樽装好饮过罐装好多🤣咁啱想食鸡又想食叉烧，不如就叫个烧味四宝饭。送到嚟真系劲大碟，一个人真系食唔晒🥹佢哋嘅叉烧食落有啲柚子甜味，甜甜地咁令人不自觉食到停唔到口，仲要烧得好均匀，唔会太㶶黑哂。妈咪就叫左个金满膳熏香烧鹅髀饭，佢呢个就犀利啦，超级大只烧鹅髀，望到佢拎住个烧鹅髀大啖大啖咬，我都忍唔住食咗两啖。