東哥點心籠仔蒸飯專門店

营业中

休息中

屋企附近開咗呢間東哥之後，街坊朋友介紹咗幾次終於去咗食，試過閒日特價下午茶、晚市同埋周日午市先決定寫食評，基本上質素keep到，唔會特價時段分別好大。上兩星期再去發覺餐牌稍為改咗少少，好好味嘅紅米奶皇煎堆仔冇咗，變咗黑白芝麻糖不甩，唔開心。佢嘅蘿蔔絲酥同鮮蝦腐皮卷都好好食，即整熱辣辣，外層厚薄啱啱好，味道拍得住大牌貴價茶樓。其他點心亦算水準中上，好過唔少連鎖茶樓，不過水晶皮類點心略嫌皮偏厚唔夠彈，明顯係澄麵同水比例差咗少少，但可以接受。不過馬拉糕唔夠鬆軟，試咗3次都係入面氣孔唔夠，所以唔夠軟綿，但濕潤度還好。