彩

营业中

休息中

彩系佢开冇耐我朋友带我黎食过，果阵我未食过好味嘅沾面，简直觉得惊为天人，个浓虾汤汁系橙红色㗎！又浓又香，好杰，我平时好怕食拉面旧叉烧，但佢整得又淋又好味，糖心蛋就好多都整得好食，但佢就可以个蛋黄全糖心，配一个黑椒面，黑椒系研碎一粒粒咁布满面条，总之系一试难忘！食多一两次后，无啦啦就话执咗，好似有嘀人事纠纷...当时觉得相当可惜，你知啦！无得食就零舍挂住，又唔知有冇更加美化到碗面，当我知道佢开返，又入开元朗紧系会一会佢啦！谂都冇谂就叫返浓虾汤沾面，不过面底佢有个是日限定柚子㖞！咁就转黎试下啦！噫？！今次唔多对路㖞，个汤底水咁多嘅，而且虾味都冇咁浓，沾面嘅汤应该比较杰身先挂到落嘀面，但佢依家只系咸同普通汤咁，其实我系失望㗎，重叫咗几个朋友陪我食，我重谂紧系咪我记错呢？点知我朋友率先发声，话个汤底水咗咁多，咁证明佢变咗！佢变咗啦！之后侍应哥哥过嚟问我地觉得好唔好食，我地都照直讲，佢话师傅会因应天气，好似依家比较热同湿，做一嘀口感比较清爽嘅汤底，轻盈一嘀！师傅有性格，我呢嘀食惯重口味，一时三刻改唔到，下次都系冻嘀先再黎食啦！