一浩 (已結業)

今日我们去咗屯门黄金海岸商场行街，见到有间新开嘅日本餐厅「一浩」，店内嘅环境装修非常高雅，座位相当宽敞舒适，有一个好大嘅开放式寿司吧同另一个独立嘅铁板烧吧，可以畀人客选择坐喺吧台度睇著师傅即烧即制畀我们食，所以我们就决定喺度食晚饭！因为当时我们谂唔到想食咩，所以叫咗铁板烧师傅帮我们精心安排几款佢嘅拿手招牌美食！日式牛油炒什菌拼牡丹虾天妇罗系即叫即炸，相当新鲜热辣，炸粉唔会好厚身，虾肉嘅肉质超爽甜弹牙！香煎顶级鹅肝煎得薄薄一层金黄香脆嘅表面，可以食得出师傅控制火候嘅功夫相当了得，入面极之香滑软绵绵同入口即溶，而且完全唔油腻同无「骚」嘅味道，令到平日唔系太钟意食鹅肝嘅我们，都觉得超级好味同一试难忘！系本人极力推介！一口和牛煎到五成熟，每一口亦都系薄薄煎香一层，可以锁著肉汁，肉质超嫩滑，必定要一试！至于寿司方面，师傅就特意为我们做咗一幅用多款色彩缤纷嘅新鲜寿司堆砌而成嘅寿司画，卖相非常精致吸引，靓到唔系好舍得食！另设有酒吧区，有多款特色饮品可供人客选择！总括：喺呢度食饭，望出店外有一个景色怡人嘅无敌大海景，有美食同美景，真系人生一大享受！有时间嘅话，我必定会再嚟享受人生！