裕興咖啡

营业中

休息中

由于以前经常都会嚟盛记食晚饭，所以一向对于士丹利街呢炸绿色铁皮屋排档有一份情意结，今朝过开嚟中环开会，喺OR揾食见裕与有个花生酱椰菜五香肉丁多士呢个组合咁有违和感，又咁嚣张净系做早市，就把握呢个天九食日既机会喺度咬个老早喇。由于我九点几先到，大部分港猪都返哂猪场坐监，四五张细圆枱夹埋得十个人赌；坐低谂谂吓得一个餐屎唔敢试𠮶个有违和感既组合，都系嗌番啲大路野。寻晚饮完酒，今朝想食啲湿野所以无嗌到三文治，拣咗个五香肉丁炒蛋面，五香肉丁被撕得细碎，不过份量都唔少，肉丁炒蛋唔系咁多地方有，个蛋都炒得好香。汤底系原著既出前一丁麻油面，不过佢可能无落哂包粉，有啲淡口。炒蛋同面中间夹杂大量既椰菜，连钟意食菜既我都觉得有啲多得滞。杯奶茶我嗌咗少甜都仲系甜得滞，老板娘见我饮剩一大半问我杯奶茶系咪有问题，我话甜咗啲，佢就前后三四次话即刻整过俾我同叫我下次嗌少甜，唔知系写漏咗少甜定少甜咗我都觉得太甜呢，不过老板娘主动关心杯奶茶饮唔哂仲帮你整过呢个举动都经已令人相当温暖，下次九星连珠之时可以同胖侣再嚟试吓个花生酱椰菜五香肉丁多士，我估个肉丁炒蛋用嚟衬多士应该会好过衬面。