金源燒腊茶餐廳

营业中

休息中

今晚依然夜放工，回到红磡已近10点，成条街都几冷清，唯独仲有几间食肆灯火通明，尤其系呢间更是座无虚席，因为门口以煲仔饭招徕。正想离开老细话隔篱铺位都系佢地，个边比较人少，坐落叫咗个膶肠鸡煲仔饭（$30），即叫即煲，等咗十零分钟就到都算快，食煲仔饭应该唔好立即揭盖俾佢焗十分八分钟，等D饭收番干水就唔会太湿或者生米，因为太饿认唔著唔够五分钟就开盖，D饭果然太湿而且仲有少少生米，非战之罪唔可以怪人只怪自已心急。价钱虽平但材料唔少，鸡都好多件但系无乜味，膶肠好香但好多肥猪肉，仲有菜同冬菇，食到尾仲有惊喜因为有饭焦。其实都好满意，不过有位阿姐要赶收工，不停催赶食客，有D客食完想睇吓电视都俾佢闹，叫人唔好阻佢收工，佢话已经做咗12个钟乜都够喇！阿姐唔好以为净系得你辛苦，我都朝九晚九啦，今时今日应该俾D心机做，唔好同老细赶客，到无客个时你想做都无得你做。