多寶美食

营业中

休息中

上一间结业后，新呢间未帮衬过。今次喺大南街寄完顺丰就行去熟悉嘅位置，过吓口瘾。嗌咗件臭豆腐，交出十蚊，臭豆腐迅速喺后面厨房传递出嚟。酱料唔系一兜兜加支木片棍𠮶种，风味骤减。唧入必加嘅甜酱同豆瓣酱，再喺边缘慢慢咬开.. 脆卜卜热焫焫！但并不能大口进食因为实在太热！一边吹走冒出嘅烟，一边尝试唔焫亲个嘴咁紧接住咬第二啖、第三啖，都因为有豆瓣酱同甜酱嘅加持，咸辣甜满足味蕾.. 件豆腐本身就冇乜味。豆腐大小合理，唯只有竹签一支，难以拮起，索性撕开纸袋食用。仲记得第一次食臭豆腐，系细个去长沙湾探嫲嫲。过咗某条马路，有个伯伯推住架木头车喺度卖臭豆腐，爸爸买俾我哋试，真系好好味！当时卖五蚊一件，而d未炸嘅豆腐就摆喺架木头车下隔嘅一个胶桶入面.. 流动小贩真系好有香港特色！至于味道，我都讲唔出个原因，但就系同大个咗之后食嘅唔同，𠮶种美味至今都未能被超越。