泰拍耶

营业中

休息中

返一日工又weekend，相信唔少打工仔都觉得格外兴奋。放工约咗朋友去黄埔睇戏，佢带我嚟佢屋企附近呢间新开嘅泰国菜，行出地铁站都唔洗一分钟就到，非常就脚。餐厅嘅装修以竹木为主，清新简约，而且空间感非常够，枱同枱之间距离都几宽，背面仲有屏风隔住，感觉好有私隐，好舒服。朋友叫嘅蝶豆花梳打，加上青柠后变成紫蓝色，饮落酸酸甜甜，加上梳打感觉清爽。我唔方便饮咁多冻嘢，所以拣咗姜茶，呢杯泰式姜茶好特别，加入咗香茅同葱，饮落好香，甜度适中，而且唔会好辣，非常暖胃。朋友指明一定要叫嘅青木瓜软壳蟹沙律，青木瓜偏酸，口感清爽，配上鱼露同大量虾米腰果，感觉好平衡。炸软壳蟹好酥脆，大大件，咬落去好香，仲有好多膏，好邪恶！炒芥兰质感爽脆，吸收晒咸肉同蒜蓉嘅味道，非常惹味。铁板蚝烙亦系朋友推介，份量都几足，即叫即整，上枱时热辣辣，配上泰式辣酱非常香口。蚝仔粒粒新鲜饱满，食落依然好嫩，同香脆嘅蚝烙形成强烈对比。蚝烙底部垫住芽菜，一来令蚝烙食落冇咁油腻，二来芽菜亦吸收哂蚝烙嘅味道，非常香口，系一个聪明嘅配搭。