為食仔海鮮火鍋專門店

营业中

休息中

心血来潮想食卜卜蚬，当然系认起旺角白布街嘅为食仔仔海鲜火锅专门店啦。天意弄人，去到先知今日无卜卜蚬食，但都嚟到喇，就照样入去食啦。为食仔出名卜卜蚬相信大家都知。除咗蚬煲，佢哋仲有鸡煲、龙虾锅、鱼锅、鸡煲翅。店员就介绍我佢嘅新推出嘅蟹鸡煲（大、中、细、BB辣）同埋龙虾鸡煲。不过我今日唔想食鸡煲，所以最终拣咗招牌龙虾海鲜锅。依个招牌龙虾海鲜锅俾咗我意外惊喜，大大只嘅龙虾，旁边仲有几只大虾相伴。锅底仲有豆腐、蛙蛙菜、冬菇、鸡髀菇，十分足料。个煲一滚起，龙虾都差唔多熟透。先试个汤头，汤吸收咗龙虾同大虾嘅鲜味，非常鲜甜。龙虾够哂大只，非常好肉，而且好新鲜。大虾亦同样新鲜。煲底嘅菜同豆腐吸哂汤嘅味道，成个煲都好正。食唔到卜卜蚬都唔系一件坏事嚟㖞。斋食招牌龙虾海鲜锅又点会够、所以点咗封门柳、弹牙香口嘅鹅肝墨鱼丸。为咗唔好浪费咗龙虾海鲜锅嘅鲜味，再加点咗杂菜同薯粉。一份封门柳嘅份量都几多，不过封门柳唔同肥牛，佢无肥牛个种油香，取而代之嘅系浓郁嘅牛肉味，而且比起肥牛有𡁻头，所以大家谂清楚想食牛味浓定油香味，唔好浪费食材呀。