十里潮香 (已結業)

同男朋友睇戏前揾食，金百利上面有好多野食，上次我哋食左韩国嘢，今次试吓潮州嘢先！环境唔算好大，但座位都几多！如果同朋友聚会10人内都可以选择呢度，因为环境比较静同舒适！食物种类都几多！对于平时比较少食潮州打冷嘅我，今次可以试返够本！卤水墨鱼片 - 餐牌上面无嘅~ 餐厅有个黑板写住今日特别推介同海鲜时令价，男朋友钟意食就叫了！入口爽口弹牙，点一点白醋增加鲜味，食到停唔到口！方鱼肉碎蚝仔粥 - 潮州菜必食嘅其中一样！汤底好浓味，蚝仔都几多几鲜味，加胡椒粉更可以将味道提升！食完唔觉得口渴感觉！青榄炖猪𦟌汤 - 啖汤好甜好浓味，有清润感觉！卤水三宝 - 男友至爱必食，极力推介粉肝，好淋身又入味，入口真系有即溶感觉，口感一流！鹅片同鹅肠都好入味，肠比较爽口弹牙！真系好想叫多碟，但怕太过饱，哈哈！盐香冻乌头 - 系用元朗黄油乌头做，肉质滑之余唔太咸！荔蓉香酥鸭 - 我地都系芋头迷，见到已经想叫嚟食！上枱时刚刚炸起好热好脆，芋泥入口好粉好好味，配以酸梅汁入口感觉有少少似甜品！我哋话同朋友或屋企人又多个地方食饭喇！下次一定要叫冻蟹试下！