一品香南北美食

营业中

休息中

今日抽起条筋想食云吞咁啱又经过一品香，点知留下不生难忘的味觉冲击。叫咗一碗菜肉云吞配锅贴豆浆。锅贴卖相可接受，但落单后唔够5秒后上台已经心知不妙。第一口咬落去既感觉好似咬紧旧干咗既冻面团，里面冇肉汁不在话下，第一次食锅贴既皮系厚到好似隔咗夜既硬身菜肉包咁。由于锅贴既馅充满味精所以搞到好口渴，一饮杯豆浆不得了。竟然系一杯冇味好似沟咗水既豆浆。威士忌沟水就饮得多，豆浆沟水真系第一次。到云吞上台，卖相都ok既，点知筷子一夹就知濑嘢。包云吞个师傅包个刻应该充满住激动既心情。D云吞实到好似乒乓肉丸咁，而里面d馅都系同锅贴一样，经过满满的味精洗礼。食咗一粒半已经顶唔顺。整体上今餐最好味系汤里面D菜。不过由于个汤都系有严重既味精所以食完都系好口渴。而家口渴到好似系撒哈拉沙漠行咗两日两夜冇饮过水咁要揾水源。隔离台两位罗致光口中所讲既中年人士，食完自己个餐听到佢地竟然话好味然后再追加锅贴同云吞。。。一品香做咁重口味既食物可能系用心良苦，等味觉退化既老友记可以品尝到久违既味道。对于味觉健全既人士，一品香，可一不可再。