影片
更多
2014-04-28
800 浏览
小弟晌开饭个人专页上，都有提及意大利菜都喺自己喜爱嘅菜式之一，难得朋友邀请，当然非常有兴趣啦。餐厅位处较少涉足嘅北角区，名字叫「Cafe Italiano」，咪以为佢喺间Cafe嚟，试过之后，认为佢喺间水准不俗，定价亲民嘅意菜小馆，夸少少讲句，真喺Cafe嘅价钱，Ristorante嘅质素，确喺意想不到 ！门面全通透玻璃窗，一眼就望到入面环境，全店主要以木材为装修素材，深浅、木纹不一嘅粗木条墙身，令人甚有身处意国效区嘅小木屋之感。再配以柔和嘅灯光，及木枱木椅，好一派悠闲风情 。所有枱櫈都可以活动组合，人多人少嚟都无问题。一张A3呎吋嘅主餐牌，已印有饮品、甜品、前菜、是日餐汤、主菜、12”披萨、意大利粉……等等多款美食。不过，有一点稍稍补充，就喺见之前有食评提及全日免收加一，但试菜当晚，已发觉稍微调整，需要收取加一服务费，咁实在由入座、点餐、出菜……全程都有人招呼，收取服务费都属正路范围。另外，仲有一个全新嘅季节性餐牌，晌传统意菜上加啲心思嚟创作，一共12款，有前菜，又有主菜，有意粉，又有意大利饭，而且印刷精美，又图文并茂，价钱同样亲民，喺不容错过嘅选择 。跟大家分享一下4款前菜先
门面全通透玻璃窗，一眼就望到入面环境，全店主要以木材为装修素材，深浅、木纹不一嘅粗木条墙身，令人甚有身处意国效区嘅小木屋之感。再配以柔和嘅灯光，及木枱木椅，好一派悠闲风情 。所有枱櫈都可以活动组合，人多人少嚟都无问题。
一张A3呎吋嘅主餐牌，已印有饮品、甜品、前菜、是日餐汤、主菜、12”披萨、意大利粉……等等多款美食。不过，有一点稍稍补充，就喺见之前有食评提及全日免收加一，但试菜当晚，已发觉稍微调整，需要收取加一服务费，咁实在由入座、点餐、出菜……全程都有人招呼，收取服务费都属正路范围。
另外，仲有一个全新嘅季节性餐牌，晌传统意菜上加啲心思嚟创作，一共12款，有前菜，又有主菜，有意粉，又有意大利饭，而且印刷精美，又图文并茂，价钱同样亲民，喺不容错过嘅选择 。
跟大家分享一下4款前菜先，有别一般常见嘅意式前菜，几款菜式配搭都几特别。意大利香甜葡萄酒浸软滑法国鸭肝 $108
两大片合桃面包一开三成6件，配以3件法国鸭肝，据介绍法国鸭肝慢煮后再以意大利甜葡萄酒浸过，鸭肝望上去内里仍一片嫣红，晌上面糁少少黑椒碎及葱粒，卖相别致。将合桃面包涂上一层厚厚鸭肝酱，一啖咬落去，软绵嘅鸭肝渗出淡淡酒香，味道有趣，而面包带有合桃粒及燕麦片，配合埋鸭肝，口感多变，喜欢鸭肝嘅人值得一试 。
烧牛仔肉薄片凉拌秘制吞拿鱼汁 $88 咪睇佢好似好大碟，除咗碟浅之外，啲烧牛仔肉又真喺切得好薄。牛仔肉又喺慢煮过，再加轻烧，仍然保持半生状态，肉质软腍嫩滑，入口竟散发出浓浓吞那鱼味 ，真喺有啲啲错觉食紧片吞那鱼咁，个秘制吞拿鱼汁实在浓香，打得幼滑，再者，依个前菜喺一道冷盘，天气开始热，食落更透心，喺甚有意外惊喜之作 。
烤意式猪肉肠配玉米蓉 $98意大利烟熏猪肉肠，肉质挺实唔削，感受到真材实料唔喺沟粉货，不过，可能烟熏制法关系，味道颇咸，所以配淡口嘅粟米蓉都喺有心思嘅做法，中和猪肉肠嘅咸味。平时食薯蓉就食得多，所以，今次配粟米蓉，虽然质感有点粗，但粟米味浓郁，我觉得更成为依道菜亮点 。
意式焖煮猪腩肉碎配合桃面包 $58 其实我唔喺好觉得佢喺一道意菜，极似台湾嘅肉燥，猪腩肉碎加上花椒、八角……多种香料焖煮，但就喺个好搞鬼嘅组合。味道香浓不在话下，十分惹味，猪腩肉碎又无想像中咁肥，放晌合桃面包之上，有种儿时露营五香肉丁夹面包嘅回忆 。
4款精彩前菜过后，由于无试店方嘅披萨，就再介绍两款意大利粉类，包括一个意大利馄饨及一个炒意大利粉。自家制龙虾馄饨配香浓龙虾汁 $108
哗，只意大利馄饨可以讲得喺飞碟馄饨，够晒大只，十分有睇头，虽然卖点之一喺馄饨皮为自家制，但个人略嫌有少少过厚，烟韧感不足 ，幸而馅心嘅虾肉慕丝做得幼滑，而个龙虾汁底浓香，又无过咸嘅常见问题，混著馄饨一齐放入口，犹如食咗大海鲜味 。题外话，其实个龙虾汁真喺唔使俾咁多，因为食完啲馄饨仲剩唔少，觉得有点嘥，有啲冲动想问吓有无斋意粉叫，捞埋啲汁再加少少巴马臣芝士应该会极滋味啰！
传统意式活蚬炒意大利粉 $109 另一个意粉类喺较传统嘅活蚬炒意大利粉，活蚬唔算好大只，胜在都够鲜够甜，意大利粉炒得有水准，有咬口，味道带点微辛、蒜香，如果再加点烟肉碎，相信会更惹味。
店方亦安排咗两道主菜俾我哋品尝，睇睇味道上仲有无需要调校一下。两道主菜分别喺一客鸡胸肉及一客烩牛膝，前者创意惊喜，后者稳中求胜。意式鸡胸肉帕尔马火腿卷 $158
店主介绍时，个鸡胸采用法国鸡胸，又慢煮，又低温烤焗，再轻煎，都几多功夫，不过，鸡胸入口未有预期中咁柔嫩；相反，味道就真喺几好，因为，鸡胸以超薄嘅帕尔马火腿包裹住嚟整，唔单止煎出嚟色泽更金黄闪𫞠，食落咸香不单调，令平平嘅鸡胸味道更丰富。
红酒烩牛膝 $168 当然用番意大利红酒入馔，牛膝炆得超腍，肉质非常松化，而且，味道浓郁又带点酒香。一客牛膝仲有啲牛骨筒，内藏如软膏般骨髓，斋食或者你会觉得几肥腻，如能配件多士就一流嘞。
一餐饭，若可以嘅话，临尾以甜品作结，总喺令人感觉圆满啲。不过，配甜品，小弟始终喜欢加杯咖啡嚟衬，但同行食友就拣咗一啲非酒精特饮。Blue Bird $30‧Peach $30‧Passion Fruit Daiquiri $32‧Margarita Guava $32
几款特饮嘅成份就唔多讲，因为晌餐牌都有注明用咩果汁配搭梳打。湖水蓝嘅 Blue Bird、浅黄嘅 Peach、橙黄嘅Passion Fruit Daiquiri及粉红嘅Margarita Guava，听食友分享，似乎Margarita Guava较为好饮，酸酸咪咪，其他几款都有少少偏甜嘅毛病，当然，口味各有不同，小弟又无饮过，都难以下判断。
Caffe Latte $28小弟拣嘅拿铁，味道又会喺点呢？个人觉得，奶泡撞落啲特浓咖啡度唔平均，所以入口唔滑，而且奶泡绝对过多，似一杯Cappuccino多啲 。
意大利奶冻 $24 奶冻何解咖啡咁色？原来喺阿华田奶冻，华田味十分突出，不过质感比较柔软滑身，唔似常见意式奶冻咁挺身，似食慕丝多过奶冻。虽然店主原意喺想做得幼滑啲，但小弟就会觉得失去意式奶冻个风格。
焦糖炖蛋 $26 属于法式嘅经典，下层炖蛋部份做得好细滑，蛋香味浓郁，而面层嘅焦糖，火枪嘅控制好好，做出一层薄薄既香且脆嘅焦糖，实在好味，点可以唔推介 。
意大利芝士饼 $28 依个意式经典，又喺小弟至爱甜品之一，被食友问到究竟有几多至爱甜品，唔好意思，实在样样甜品都钟意。马卡风芝士做得软滑细致，上层嘅咖啡酒蛋糕湿润富酒香，加埋糁上嘅唂咕粉，更添朱古力浓香。
蓝莓芝士饼 $50 对比起上面几款小杯装甜品，蓝莓芝士饼及合桃朱古力蛋糕均定价好不一样。不过，个蓝莓芝士饼实在好食，忌廉芝士所做嘅饼身，芝士味丰厚而柔滑，饼面嘅蓝莓酱，既新鲜，馅料又多，内里仍有好多原粒蓝莓果肉；唯一要挑剔，就喺个消化饼饼底做得异常之厚！
合桃朱古力蛋糕配云尼拿汁 $50 合桃朱古力蛋糕其实即喺班尼士（Brownie），个班尼士亦做得有水准，一来个蛋糕本身有好浓郁朱古力香；二来，蛋糕内有好多合桃，正；三来，质感挺实，带点湿润，唔会太干，好有实在感。
试咗咁多款菜式，虽有高有低，但拉平均而言，仍觉得整体有中上水准，尤其前菜及甜品，有唔少出色之作。再加上环境惬意，有气氛，有风格，服务又不错，值得一访嘅意菜小馆 。
张贴
