飲茶‧私房菜 (南豐大廈) (已結業)

潮流兴食趣怪点心，最近XO仔都试咗两间，并于互联网上载咗唔少靓相，不少亲友睇到都流哂口水。最爱梦游o既爱丽丝于中环工作，区内都新开咗几间有得意点心食o既餐厅，上个礼拜终于忍唔住话「想去试饮茶」，仲叫细佬负责订埋位添。点知到咗约会当日，爱丽丝一家四口迟迟未见，电话一到方才发现大家沟通上有好大o既误解，佢口中「想去试饮茶」其实系唔记得咗餐厅「X宫小聚」个名，而唔系细佬有意一访真系叫「饮茶」o既餐店，真系够哂乌龙，好彩两间食肆够近，唔系都唔知点算好。门外o既易拉架所示，「饮茶」除咗有茶饮之外，店内亦设有酒吧区域，欢乐时光傍晚六点至八点更可享买一送一优惠。店名玩味十足，室内o既装潢都一样花下不少心思。正门极受小朋友欢迎o既大货车以「YUM CHA」作牌，车身既为门面，又是厨房，透明度极高。因车门未有上锁，食客可随意上车大玩自拍。楼底高高o既店子间格开扬通爽，中午时份虽座无虚席，但声浪都唔算好嘈吵。点心纸上印有部份菜式o既插图，不过可能客路比较国际化，餐厅特别为所有𩠌菜制出精美o既图册，令点菜更为容易之余，等待食物时仲可以慢慢欣赏靓相添！衬托美食o既餐碟上有只栩栩如生o既立体小锦鲤，确真可爱极！