利滿皇宮 (已結業)

一个突如其来既港铁故障，造就咗我今日嚟呢间酒楼饮茶。原本约同事9点元朗开工，点知港铁又故障搞到同事嚟唔到，咁肯定有排等，师傅仔呢啲茶餐厅食完就走肯定唔啱等人，咁有咩好过去饮茶hea住等呢？最近西铁站既平民酒楼，我谂应该系呢间利满皇宫，门口写住孖宝28.8 (上去变咗29.8😟)，同9.8起点心 (最后见唔到有9.8既，可能我睇漏)，咁几抵㖞上去试下。点咗孖宝牛肉肠+黑椒爽肚，再点鸡丝粉卷，拎加自取凤爪排骨饭。问心呢间酒楼点心几好，尤其系牛肠，够滑又烟烟韧韧，整体点心有70分以上。另外唔系用散茶叶冲茶，而系一大包𠮶种，感觉比较卫生，但疑似铜茶壶唔隔热，唔小心就会辣亲，而且茶壶嘴设计不佳，倒茶时非常容易漏到一枱都系。至于咁好食，点解感概呢？咪就系香港服务业一直比人诟病既态度差问题。酒楼有熟客文化大家都明白，但系对生客唔礼貌甚至呼呼喝喝，咁仲点会有熟客呢？态度差，点心上枱时混埋其他点心既汁，无换连唔好意思都无仲要掉上枱，无嘢呀？一堆老鼠屎，即使食物再好，都搞到我以后都唔会再嚟呢间嘢。而家未有游客已经咁差态度，有游客嚟更加难以想象。希望香港饮食业同港铁，都会有改善服务既一日。