風月堂 (已結業)

是日主公生日,去左海洋公哈啰喂,玩完就黎左风月堂食生日晚餐。黎到都接近10点,好彩唔驶等位,不过待应话无左dinner set,即系只可散叫。第一次黎风月堂,环境好干净企理,又光猛,但枱就排得比较密,如果情侣想谈心此处不是个好选择,因为隔离一定听到晒。坐低研究menu,食品款式不少,尤其甜品,三思后都系点左正餐先再决定食唔食甜品。最后点左呢几様芝士波菜焗海鲜饭(个名大约系咁,唔记得影相......):虽然差唔多成旧水,但一分钱一分货,成碟野用料充足,味道浓郁,d汁又唔会整到d饭淋晒,水准之作。日式炒乌冬:呢碟炒乌冬卖相食平平,睇落同茶记炒乌冬分别不大,不过味道唔错,d乌冬食落都几滑。烧牛舌:我觉得好好食,口感一流,咬落刚刚好,不太淋亦不太韧,味道又入味,好食。士多啤梨特饮:饮落有少少似奶昔,清香士多啤梨味,不太甜,唔似出面有d餐廰糖浆加水,几好饮。食完已经好饱,个肚再无空间食甜品,好彩无一早叫定,唔系一定食唔落。总括风月堂既质素系水准之上,虽然同隔离女人街d餐厅比价钱唔算平,但绝对系值回票价。