慕茶 (已搬遷) 新店位置

嚟到位于观塘工厦入面嘅慕茶。入去之后系小小嘅玄关，摆放咗雪糕车等等，装饰好淑女风。佢哋都系用木为主嘅家私。个感觉都几简约柔和。啲灯饰仲几别致。佢哋有自助茶水，不过我叫咗饮品，所以就无斟嚟饮喇。食物方面有提供主菜，不过我对佢哋嘅甜品兴趣更大，加上餐厅系以茶味雪糕驰名，所以呢次只系试甜食同饮品。玫瑰花奶茶，闻落玫瑰味强烈，饮落同牛奶几夹，又唔会甜到漏。不过我睇咗网上唔少人嘅相，佢哋啲热饮杯入面都有隐藏动物公仔，可惜我呢杯系无嘅。有见心太软要等半个钟，所以就叫咗茶味雪糕试试先，雪糕碎冰幼滑。普洱茶雪糕呈啡色，味浓郁甘香。玄米白茶雪糕食落有米香同颗粒，相对起嚟较普洱茶口味淡。慕茶紫薯心太软配雪糕，以为会系好靓好明显嘅紫色，实际颜色暗沉偏啡。好在心太软中间嘅流心澎湃，外皮微脆内松软，偶尔仲食到天然嘅紫薯味，当中夹杂蛋香。雪糕方面我就拣咗蜜糖茉莉花茶雪糕，色泽暗黄，茉莉花香突出，同样微甜而清新。