霞飛會館 (已搬遷) 新店位置

 今日第一次去食中环嘅「霞飞会馆」，见到佢地个特价晚餐好似都几抵食，就点咗呢个餐喇。呢个「红烧一口翅」啲用料认真唔错。唔会好似出边一般中菜咁得一少撮，而且啲翅都算几粗。味道就少少偏咸。之后呢味干烧虾球都算几惊喜。虾肉冇用太多粉去炸亦非常之爽脆！个汁同我所想嘅干烧虾球有啲唔同，佢地呢个汁少少辣加甜甜地，味道同虾肉好夹，唔错唔错。之后系「鲍汁扣花胶」，其实餐牌有得拣花胶或者辽参，最后我拣咗花胶。件花胶都算几大块，口感都算几好，但未算系入口即溶嘅感觉。反而个鲍汁真系好味。好香同鲍鱼味浓郁！佢仲有少少白饭，用啲鲍汁黎送饭一流！最后仲有餐厅嘅招牌菜小笼包。做得招牌菜都知道唔简单！只系用筷子夹起已经感觉到入边嘅肉汁荡来荡去，点心皮够薄但又唔会好易穿。第一啖真系要好小心，因为皮入边真系好多汤汁同好热，啲汤汁极之鲜甜！呢个小笼包都算系我食过嘅小笼包入边数一数二了.其实仲有个头盘嘅螺片不过影唔切相。成个餐$298 一个人再加一。又有翅又有花胶，以咁嘅用料同埋味道，价钱都算几合理，喺中环都应该揾唔到几多间了。