Lobster Une (已搬遷) 新店位置

今日行过呢间餐厅，见个叔叔店员亲切而努力咁推销午餐，就谂住试吓啦。入咗去谂住叫午餐牌上嘅海胆卡邦尼意粉，落单，点知过咗一阵，佢话海胆昨晚卖晒，所以无。我心谂昨晚卖晒，点解个手写黑板餐牌上仲有？而个推销侍应又唔知？真离奇！好啦，咁唯有试吓佢哋好落力推介嘅龙虾包餐！点知来到个包细到呢，啲龙虾又唔多，碎湿湿咁，无啖啖肉嘅感觉，而且除咗两三片菜，再无其他配料，味道又清淡，同我之前系其他专食龙虾包嘅铺头比，差几条街。我食完，好似冇食过嘢咁，而且配菜系现成薯片！喂，你俾炸薯条或焗薯填饱个客嘅肚都好啩，起码食饱啲无咁火。好啦，出甜品，睇个样系现成泡芙，加几粒水泡形状嘅彩色Cereal！哇！呢个系减肥餐呀？成200蚊，食啲咁嘢，真系好昆水！食完，个阿叔好亲切埋来问意见，我就费事直讲，只系讲ok ，不过清淡咗啲，点知佢听到唔系预期嘅赞赏，就只系讲咗个「好」，就行咗去，同头先推销我入来完全两个样！咁都得？最后我走，连拜拜都无讲。我本来谂住唔啱口味又唔够饱，当自己唔啱食，但见到咁，真系忍唔到，要上来报告俾大家知。你哋帮唔帮衬，自己谂。