茶檔

营业中

休息中

喺香港仔做嘢做咗一段时间，基于疫情，经常都会喺附近嘅茶餐厅买外卖返公司食，食过咁多间，就系情有独钟呢间叫茶档嘅茶餐厅。《干炒叉烧河》🐷🔥间舖头只系小店，座位只有几枱，但系日日都爆满坐，嚟买外卖嘅人都非常多。论价钱，呢一间茶餐厅唔系最平，但味道一定系附近之中最好嘅。食过佢几款午餐，都系情有独钟佢嘅干炒叉烧河。食得炒河就唔会怕佢肥腻，反而系怕有啲餐厅用唔够油炒，而呢度嘅炒河就做到条条河粉都非常分明，唔会好似某啲餐厅咁炒到有啲河粉一旧旧。河粉方面，餐厅用上幼河粉，一般嘅餐厅都只会用呢种幼嘅河粉嚟做汤河粉，但而家攞左嚟炒，反而有惊喜，我觉得仲好食过用粗河粉。至少呢间茶餐厅唔似其他咁误将贵刁同河粉混为一谈。虽然只系小店，但系佢嘅炒河真喺非常够镬气，及得住大排档，而且佢嘅用料都非常足料，叉烧、韭黄、芽菜、芝麻同葱全部有齐，连同河粉落镬大火炒起，香气十足，就连我附近嘅同事闻到都口水直流。最后再配埋一杯标准嘅港式茶餐厅香滑奶茶，为我整个下午差足电。